–
今日係最後一日係大阪啦，
我地會搭5:20p.m.的機返香港。

我地今日8點幾起身，
執完行李就check out 啦。

然後我地就去JR大阪站到寄存行李，
因為我地想行下心斎橋先，
而且我地最後會係JR大阪站搭地鐵去關西機場。

JR大阪站有兩種寄存行李，
分別係counter度寄，
或者係自助形式寄係locker度。

當然counter係每件行李計錢，
而locker就係以locker的容量大細去計錢。
我地有兩個大喼、同埋一個可摺疊的hand carry喼，
所以寄存係locker係最化算！

首先搵個空的、夠放你D行李的locker，
然後放行李入去，
跟住啪個lock制鎖住個locker。

然後去部機度揀番你個locker比錢

可以比紙幣、散銀、Icoca卡。

我地租左兩個locker，一個700円、一個500円。
我地租一陣黎講的確唔抵，
但唔想拎住咁多野行街，
而且酒店距離JR大阪站都幾遠，唔想哂時間番去拎行李，
所以要用錢黎換方便同時間！

－－－－－－－－－－－－－－－－－－－－－－－－－－－－－－
跟住我地就去心斎橋黎個最後沖刺啦！
最後剩係係Wego買左D裙。

之後我地就去食Luke’s Lobster，
佢係一間美國紐約的小食店，
睇個名就知間店係同龍蝦有關，佢係專賣龍蝦卷的，
日本係除美國以外，唯一有分店的國家，
所以除左去美國，只能係日本食到Luke’s Lobster。
呢間野好多人排隊，
次次經過都有條人龍，
今日都唔例外。

Menu，價錢都唔平呀！
佢仲叫你自備散銀添 (好彩我地有好多！)
我地買左Lobster Roll (US) 1580円，
好多龍蝦肉 好正 夠咸 夠juciy，
見到都想即刻飛去日本再食！

食完之後我地就去番JR大阪站的locker拎行李，
然後搭JR去關西機場啦！
－－－－－－－－－－－－－－－－－－－－－－－－－－－－－
最後我地又早左到機場，
櫃台係班機起飛前3個鐘先至開！

人類總是犯同樣的錯誤。

所以我地就周圍行下，
機場有層好多手信賣，
我地都係睇下有咩好買，
留番入左禁區先買零食手信，
因為禁區入面係免稅的！

但我地係3 COINS OOOPS度買左兩個水樽，

3 COINS OOOPS好似Daiso咁大部分貨品都係同一個價錢，
而3 Coins顧明思義就係3個銀仔，
即係貨品都係300円(未連稅)啦，
稅後324円。

另外男朋友仲係Daiso買左個行李帶黎玩，
即係綁住行李個D帶，
100円(未連稅)，稅後108円。
但買完唔識用，
而且質素差，
所以用左一次就打入冷宮，
視為雞肋。

－－－－－－－－－－－－－－－－－－－－－－－－－－－－－－
之後我地就去check in 啦!
係去大阪玩 之 出發前先興奮講過，
我地買左回程40kg(我地兩件行李寄係一個人)，
最後剩係用左30kg only(高估左自己買野的能力 haha)。
然後我地就帶左面的細喼hand carry (去程我放入大喼入面)，
帶呢個細喼係明智的選擇，
因為禁區好多手信買！
好多大媽買到要拆盒 買行李袋 去諗辦法塞滿d手信，
大阪機場都check得好嚴(可能只係Jetstar問題？)，
職員會check清楚只可以帶兩件hand carry上機，
相反我地係沖繩搭港龍 手上三袋四袋都無人理！
所以大家如果打算係關西機場瘋狂買野就要帶定個行李袋/細喼。

分享下我地係關西機場買左D咩手信啦：
首先就係黎日本必買的Royce朱古力啦

我買左Potatochip Chocolate[Mild Bitter], Nama Chocolate [Bitter]
我鍾意食黑朱古力！

男朋友就買左期間限定的Nama Chocolate [Orange ＆ Mango]，
佢話”yummmmm爆”，即係超級好食的意思！

Potatochip Chocolate [Original]，
有朱古力的甜之餘 仲有薯片咸咸地的味！

Nama Chocolate [White]，佢話好正！

然後我地買左一人一盒Tokyo Banana
一盒8粒，好好味
就算唔係去東京 見到都要買黎食！

仲買左白之戀人

買左Kyoto Veneto的餅
Kyoto Veneto係一個京都的牌子


好似白之戀人 但係綠茶味

買左三角形的菓子，叫做おたべ Otabe佢係京都的特產

我買左一盒有肉桂＆抹茶兩種味，
我覺得肉桂的Otabe好好味，
甜甜地又煙韌。
抹茶我就唔食，
拎左黎做手信(佢係分開兩個味道包裝)。

男朋友就買左蜂蜜檸檬味，
都係寫篇blog先知原來係期間限定的味道，
佢就覺得隻味好怪，食唔出係檸檬味，
但係佢有位同事就好鍾意(口味的野人人都唔同)

買左Pablo出的芝士餅

見到封面以為係獨立包裝，
而且係我鍾意的芝士，滿心期待……

打開左原來係一舊野，仲比把刀你自己切。
切完會散開幾層，
我係完全唔會切到好似封面咁靚，
味道又無乜芝士味，
最後食到得番1/3頂唔順，
比左男友幫我清左佢lol，
點知佢又覺得幾好食(口味的野人人都唔同x2)。

最後買左Frantz出的神戶莓

個包裝好靚

粒神戶莓都好靚，
男朋友比佢外表吸引左而買，
其實外層係朱古力黎，入面係草莓乾，
唔係特別好食。

感覺買左好多野食，
但番到香港先發現無乜野做得手信，
得白之戀人可以拎得黎派，
因為好多手信唔係獨立包裝，
其次當時正值炎炎夏日，
朱古力/Tokyo Banana帶左出街都唔好食，
加上有D野食好快就到期。
大家買手信記得睇下有無獨立包裝，
而且會唔會好快到期呀！

除左手信之外，
機場仲有好多化妝品護膚品賣，
我剩係Fancl, YSL買左野。
Fancl係機場買係免稅，
我其實有係出面商場幫朋友買Fancl的產品
但退稅要排隊 幾哂時間，
好多商場又要收免稅的手續費，
不過對比係商場買野 關西機場買野係無服務可言。

仲有，之前係去大阪玩 之 Day1a (通宵巴士去梅田,買ICOCA卡,電話卡,兌錢)提過，
係淘寶買的Sim卡送的5%優惠券都可以黎買化妝品，
即係免稅之餘 仲有95折！
－－－－－－－－－－－－－－－－－－－－－－－
買到一袋二袋之後 就放哂D野係細喼，
然後搭電車去登機閘口啦，
閘口附近其實都仲有一兩間鋪賣手信，
但係D價錢突然比頭先貴左好多！
所以都無頭先人頭擁擁的情況。

有時間剩我地就食D野先，
個度有間叫PRONTO的餐廳，
係買完野食 再搵位坐個種。
地址：大阪府泉南郡田尻町泉州空港中1番地　関西国際空港ターミナルビル３F

(photo by oｈ-tabe-point)

買左碟意粉

芒果cake，好味的。
總共2000円。
之後就上機啦！

－－－－－－－－－－－－－－－－－－－－－－－－－－－－－－－

當時7點半，係機上見到日落。

接近8點就快landing，見到維港，
唔知幾多尺高空上飽覽香港夜景。

好似係第一次呢個時間番香港，
仲見到青馬大橋。

晚上9點鐘，
係T2的Arrival lounge度食D野就番屋企啦。

熱氣的食物又有 健康的沙律都有

無魚蛋河，卻有牛肉麵。

大阪之旅完啦，
下次分享下大阪住左的兩間酒店！


旅遊日期：2016年6月13日至6月18日

=========================

覺得呢篇blog幫到你， 記得like Facebook Page  https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update！

=========================