～今日的行程～
7月1日： 早：Aqua -> 跳島 -> Olango Island的San Vicente浮潛 -> Nalusuan Island -> Pandanon Island -> 午：Topie and Dinah Floating Restaurant (水上海鮮餐廳) -> Mactan Marina Mall -> Savemore Market -> 晚：Zubuchon (燒乳豬)
宿霧總共有167個島，
我地今日早起身去跳島Island Hopping，
去遊覽島仔之前就食番個早餐先。
我地入住的Shangri-La's Mactan Resort & Spa有兩個地方食早餐，
分別係Aqua同埋Tides，
兩個都係自助早餐，
聽網民講Tides的食物種類豐富d。
由於我地打算去浮潛玩下水，
所以唔食咁飽，
就揀左少d野食的Aqua。
我就拎左呢碟。
男友拎左呢d，
佢好少可拎咁少野食架，
睇得出Aqua係無咩野食。
但Aqua就光猛d，少人d。
跟住見到呢d好似糭嘅食物，
就拎左黎試下。
原來佢係菲律賓嘅甜品黎，
長條形個隻叫做Suman，
係用椰奶煮熟的糯米製成，
用香蕉葉同椰樹葉包住d糯米去蒸熟架，
我覺得幾好食。
而三角形個隻叫做Puto maya，
係講宿霧語的地區較為流行，
Puto maya通常配埋熱朱古力係早餐的時候食，
所以通常都會叫做Puto maya & sikwate。
距離酒店十分鐘路程有個碼頭叫做Hilton Port，
我地打算去呢度搭船出去。
見到Mövenpick Hotel Mactan Island Cebu就差唔多到Hilton Port啦。
再行前少少見到呢個廣告牌，
下面有d彩色的圍欄，
就可以轉右啦。
繼續前行就會係Hilton Port啦。
未行到去碼頭就有船家坐住電單車問你跳唔跳島，
佢地手上都準備左12格的圖片&島名比你揀去邊個島！
我本來想去屬於薄荷島(Bohol Island)南面的Balicasag同埋Panglao的Virgin Island，
但係船家話太遠，要4個鐘的船程先去到，
要住係Panglao上的Alona Beach跳呢兩個島先近！
所以我地唯有揀D近的島仔，
最後選擇可以浮潛、位於Olango Island的San Vicente，仲揀埋Nalusuan Island，同埋Pandanon Island。
船費收我地PHP$4000兩個人 (約HKD$630)。
（網上睇過，去Pandanon Island的船費會貴PHP$1000，因為佢比較遠d）
之後船家就帶左我地去Mi Cabana Resort hea陣，
因為佢地要準備船。
船員就主動幫我地影下相。
其實呢度d背景都無乜特別。
船家準備好船，
我地就行去Hilton Port啦 (其實只係係隔離)。
我地要經過搭渡輪嘅入口去碼頭上我船家架船。
(直行直過，係唔洗比渡輪船費架)
呢架就係我地出海嘅船啦。
8:50am我地上船啦，
原來係靠一塊木板由碼頭駁上船架。
男朋友又孭背囊又拎住袋浮潛野，
最後要船長扶住先上到船。
船上面d魚圖案都幾可愛。
船上面除左圖中負責駕駛的船主，
仲有兩個助手，
一個係老的，
另一個係後生的，感覺仲比我地年輕。
出海嘅時候船員都好主動咁幫我地影相。
我膝頭個傷口係上次快閃越南整親的。
咁岩遇到運煤嘅船？
9:30am到左第一站Olango Island的San Vicente，
圖中係老d個個船員，
佢負責停泊架船。
d海水好清澈，
睇到海底好多魚仔呀！
旅行前網上見到話租借浮潛工具要比PHP$100一個人，
於是我地就帶左自己的浮潛用具黎宿霧！
船上面仲有救生衣俾我地著的，
我地著好浮潛衣、眼罩、呼吸管、蛙鞋、救生衣準備落水浮潛啦，
另外，除左前面提及PHP$4000船費之外，
每個島係會收入島費，每個島的價格都唔同！
San Vicente的入島費收左我地每人PHP$200，
(當時有個女人撐隻船黎收我地錢)
而事後網上睇到係San Vicente浮潛，只係收PHP$75一人！
食水好深呀，但係後生個位船員服務幾好 (之後會講)，
所以PHP$200都抵比嘅。
我地兩個落水慢慢浮潛啦，
船員仲幫我地影番張相添。
另外，船長出發前買左d麵包比我地，
比我地拎黎餵魚，吸引d魚仔游埋黎。
呢度多魚到，
拍攝途中唔覺意掂到d魚仔好幾次！
d魚仔好鐘意游埋一齊，然後散開。
男友用GoPro Hero 6，我用iPhone＋Muji 防水套。
不過今次無教練帶住，
我地都唔會游到好遠，
而且呢度咁多魚，都唔洗游去邊了。
另外，宿霧呢度可能係太多遊客，
留心發現會見到海面有好多唔同種類的垃圾，例如食物包裝、奶咀等
覺得d島收咁貴的入島費，
真係要清理一下海面的垃圾！
一掉麵包出黎，就有堆進擊的魚仔搶黎食！
潛到最後水流好急，
我地都冇力游返去船到，
年輕的助手唯有落水，一個人拖住我地兩個游返去架船到，
佢只係拎件救生衣比我地捉住，咩裝備都冇！
無停過咁游足10分鐘！(真係好厲害！)
之後就去Nalusuan Island，
當時係10:55am，由於當時潮漲緊，
船主就話潮漲的時候個沙灘都淹沒左，
上到島都無野好做，
於是就建議我地係島外圍影下相，
然後直接去下一個島，
可以慳番d登島費，
於是我地就接納左啦。
登Nalusuan島的船都唔多。
望到離遠有座島，唔知係咩島呢？
11:35am我地到達Pandanon Island啦。
Pandanon島距離比較遠，
所以由Hilton Port去Pandanon島船費都會貴PHP$1000。
船主就聲稱呢個島的入島費係PHP$200一個人，
年輕的助手會跟埋我地入島，
幫我地拎下野、影下相咁，
所以我地要比的入島費會係PHP$200x3 = PHP$600，
但島上d職員剩係收左我地PHP$400 lol。
其實島上D牌寫住入島費只係PHP$150......
佢地打斧頭都預左，
但估唔到島上d職員無收到年輕助手個份入島費，哈哈。
島上有好多好度假Feel的座位，
枱上都放左一碟碟食物。
黎Pandanon島之前，船主都介紹呢個島上面有野食&問我地食唔食午餐，
我地身上唔係帶左好多錢，所以都無諗住食野。
呢d成排都係比旅行團黎食，
我地係島上見到好多韓國人。
呢度有座屋仔，
我地行去睇下先。
原來係一個小教堂黎，叫做Pandanon Chapel。
然後我地就叫年輕的船員幫我地周圍影下相。
原本想影跳起身嘅相，但唔成功。
呢度有個涼亭影下相。
呢個小島水清沙幼，
留心睇會見到有D細魚游黎游去。
呢度的遊客都幾多，
沙灘都發現唔少垃圾！
第一站就去左浮潛，
搞到d妝都甩哂，
所以影背面就最靚。
由於潮漲，
呢個島的沙灘變到好細，
好快就行哂整個沙灘啦。
然後我地再周圍Explore下。
之後我地就行左黎呢座類似觀景台的建築物。
好多船停泊左係呢個小島上，
離遠可以望到Pandanon島民居個部分。
呢面望到教堂的正面。
呢種茅草屋頂的涼亭好有海島feel呀。
逗留左接近一個鐘，12:30pm我地上船離開啦。
坐左半個鐘船以為就快到Hilton Port，
(明明講左我地唔洗食lunch)
咁我地都比下面入去睇下咩環境。
入面係咁嘅樣，
要係收銀度叫左食物比錢先，
然後會有人送食物上黎。
餐牌掛左係牆上，無寫價錢。
望落好似好唔新鮮？
一碟魚PHP$1050，一碟蝦PHP$1100，
我地最後叫左一碟魚，仲R左職員送碟Garlic Rice蒜香炒飯比我地，
身上岩岩好夠PHP$1050。
係我地等食嘅時候，
有隻貓咪走左過黎。
一野就跳上我身上面訓教！
睡眼惺忪的貓貓。
呢隻貓咪超級嗲呀。
黎到呢間餐廳最開心係遇到呢隻貓貓。
終於上菜啦，
條魚竟然係要PHP$1050！(約HKD$166)
由於男朋友唔識講價，
擺明俾人搵笨呀！
由於我地俾完PHP$1050已經冇哂錢，
男朋友就叫餐廳送埋碟蒜香炒飯，
呢個炒飯不得了，d蒜蓉的香味好正，咸咸地咁，
令我愛上了蒜香炒飯！
坐船途中船主都好鐘意同我地傾計，
問下我地黎幾多日、住係邊咁，
佢又分享自己遇到一個日本客，
佢邊度都唔去，
只係去Pandanon島，
然後影下相就走。
我地2:30pm就返到Hilton Port啦。
之後我地就行番去Shangri-La's Mactan Resort & Spa，
放低野換過件衫，
然後我地就黎左resort嘅Seasports Center book定聽日想玩嘅水上活動。
大家有無覺得我比今朝曬黑左呢？
我地住嘅呢個香格里拉resort好大架，
之後會出番篇文章詳細介紹！
之後我地就坐Grab去Mactan Marina Mall。
Mactan Marina Mall的入口，
呢個商場比較地踎，
因為我地要黎呢度兌錢，(身上無哂現金了)
呢度嘅匯率靚d。
呢度有間Savemore Market超級市場。
地址：Blk D. Mactan Marina Mall, MEPZ 1, Lapu-Lapu, 6015 Philippines
入面有得兌錢，
兌完錢又可以行超級市場！
呢度嘅匯率比機場靚，呢度個rate係6.65，
即係用HK$1000，換到PHP$6650。
而機場個rate係6.06，HK$1000只係換到PHP$6060。
好多錢呀。
我地買左好多野呀，等我詳細介紹買左咩先。
Tobi Banana Chips，PHP$17.5。
Oishi Crunchy Karl's Corn Snack，PHP$5.5，似時興隆芝士圈。
Oishi Corn Olé，PHP$5.5，日本個隻粟米筒，但佢就無咁硬，有少少胡椒味。
Rinbee Cheese Sticks，PHP$5.5，口感似卡樂b的什菜薯條，咸咸地，芝士味唔濃。
Regent Sweet Oh! Donut Shaped Chocolate and Caramel Coated Snack，PHP$22.5。
Oishi Cheese Clubs，PHP$5.5，芝士粟一燒。
Oishi Pipe Bite，PHP$7.75。
Oishi Prawn Crackers，PHP$5.5，夠咸，好爽脆。
Oishi Mobster Caramel & Cheese Popcorn，PHP$7.95。
Choco Mucho，PHP$6.95一條，
中間係caramel醬。外層係cereal的波波，
白朱古力就甜得濟，黑朱古力就中和返，岩岩好。
Mentos Choco Caramel，PHP$34.5，
見到朱古力焦糖味的萬樂珠，就買黎試下。
7D Dried Mangorind 175g，PHP$66.5。
芒果乾＋羅望子製成的糖，
濃濃芒果，口感好軟軔，好好味。
7D Dried Mangoes and Dark Chocolate，PHP$87.5，
我覺得芒果乾同朱古力唔係好夾。
7D Dried Mangoes，100g PHP$91.5，200g PHP$182.5，
我覺得7D係市面上最好食的芒果乾，
黎到宿霧緊係買多幾包啦。
Conching OTAP 150g，PHP$55.5，
似蝴蝶酥。
Cebu's Special Turrones de Mani，PHP$84.5 (有15條)，
Turrón係源自西班牙的糖黎，有d似牛軋糖，
但成份主要係蜜糖、糖、蛋白、杏仁。
而Turrón de mani，就係用花生製成的Turrón啦。
Zesto Calamansi Juice，Calamansi中文係酸柑，類似青檸汁咁，PHP$8，
Zesto Mango Juice，PHP$8.5。
LOCALLY Tamarind，羅望子汁，PHP$28.95，
LOCALLY Guyabano，番鬼荔枝汁，PHP$28.95。
LOCALLY係菲律賓飲品牌子黎，標榜材料100%來自菲律賓。
Lenny's Bakeshop Special Hopia Mongo，PHP$55，
Hopia中文係肉餅，係一種豆製月餅，
係由福建傳入菲律賓架，
男朋友好鍾意呢類甜點，就買左黎試下。
Lucky Me! La Paz Batchoy，PHP$11.5，
雖然寫住豬肉，但味道似牛肉麵，
有少量豬肉粒，好味。
La Paz Batchoy係菲律賓好常見的湯，
入面會加豬內臟、雞湯、牛肉湯同埋麵架。
Quickchow Instant Pancit Canton Classic Flavor，PHP$8.2，
d麵好黏，麻麻地，分量好少。
Pancit Canton係菲律賓style的炒麵黎架。
Lucky Me! Pancit Canton Kalamansi，PHP$9，
呢包又係Pancit Canton，佢的青檸味好突出好香，
但男友唔鐘意個麵條好實好扁。
Nissin Pasta Express Sweet Filipino Style，PHP$11，
仲買左呢個菲律賓甜味style的意粉添。
Aji-Shio Garlic Seasoning Mix，PHP$22 (有12包)，
水上餐廳個Garlic Rice太好食，
於是就買左d蒜蓉粉返香港整黎食，
結果係整唔到人地咁好食架。
行完超市之後，
我地見到門口有d小食檔，
於是我地就買黎試下啦。
Vegetable Lumpia， PHP$20，原來係由福建人傳入菲律賓，
佢類似炸春卷咁，入面係菜，Lumpia中文又叫做潤餅。
Turon with Langka，PHP$15。
Turon係菲律賓地道的小食，有d似Lumpia，
但佢嘅餡都會係生果，例如我地買呢個係大樹菠蘿。
Mactan Marina Mall的對面就係Island Central Mactan啦，
我地聽日先黎呢度行。
我地就去左Mactan Marina Mall附近的Zubuchon，
Zubuchon係一間宿霧食燒豬的連鎖店，
拆解呢間鋪的店名，Zubu係來自16世紀的時候宿霧的名字，
Chon係來自西班牙文Lechón，係燒乳豬咁解。
菲律賓曾經係西班牙的殖民地，
呢度西班牙燒豬就傳入左菲律賓啦，
而菲律賓人仲視燒豬係國菜添。
地址：M.L. Quezon National Highway, Lapu Lapu 6015 Philippines
間店都幾好坐架。
張menu寫住"As a matter of fact, we're more than just lechon."
意思係"事實上，我地唔止係燒豬。"
即係呢度仲有其他好食的菜式嗎？
d碟都幾靚，唔係普通一隻白色碟。
有碟花生，
仲有碟調味料，有青檸、辣椒等。
我叫左Iced Tea，有塊橙係入面的檸檬茶，PHP$60，
男友叫左Tamarind juice，PHP$80，羅望子汁，杯邊有鹽巴，好正呀。
Zubuchon Boneless Small，PHP$290，
招牌菜燒豬！
我地揀左無骨的燒豬，份量揀左細，適合兩個人食。
Zubuchon Sisig，PHP$220，
鐵板碎乳豬，Sisig係菲律賓地道的菜式黎架。
Kalabasa Soup，PHP$170，
南瓜忌廉湯，面頭加左d豬肉乾。
由於今日係水上餐廳碟Garlic Rice炒得好正，
我地今晚又叫番碗Garlic Rice，PHP$45，
無論賣相同味道，都無水上餐廳咁好食！！！
以上的價錢已經連稅，另外要比5%的服務費，
總共食左PHP$903.62，
比lunch個碟魚仲平！！！
我地食完野就call Grab返resort啦。
旅遊日期：2018年6月30日- 2018年7月2日
=========================
=========================
| 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ 收到個blog的最新update！ |
0 comments