上篇講到我地補眠到夜晚7點鐘起身 然後落街搵野食！
上一篇 請睇去大阪玩 之 Day1b (大阪城,黑門市場,固力果廣告板,Pablo)

－－－－－－－－－－－－－－－－－－－－－－－－－－－－ 

我地去左心斎橋的新世界元祖串食野！
地址： 大阪市中央区心斎橋筋1-5-17

我地唔記得影門口相，所以上網搵左張，
記住門口有個大叔拎住兩串串燒就岩啦！

(from: https://www.hotpepper.jp/strJ001039851/)

呢間新世界元祖串係有好多分店，
大家可以去佢個官網睇下！
http://www.kushikatu-daruma.com/tenpo_shinsaibashi.html
每張台都有個mon比你叫野食，
有日文、英文同中文揀，
就算揀左中文，D食物都只係得英文(好似上圖咁)。
老實講 有時睇哂英文、日文都唔知個食物係咩黎 lol
但好彩有個熱門排行榜 榜上的食物都係好正！
揀哂排行榜D野食就無錯啦

點完野食之後，
就會有列車將炸好的串燒 送到你面前，
好似元氣壽司高速線咁！
我地又唔記得影相，所以上網搵左張。
(from: イケ～ル)

列車到左之後，
店員就會過黎將d串燒放係台上，
然後講番個食物名比你知 (其實大部分都唔知佢講左D咩)

唔同串燒的食法都唔同，
大部分都係將串燒點落D醬到，
但記得食之前點醬，食之後唔好點醬呀！
無人想食你口水尾呀！
Menu 有寫清楚邊種食物要點D咩，
有D食物唔洗點醬，落鹽就ok啦！

總括黎講，D串燒真係好正，個人推介排行榜上的食物！

總共食左3564円，唔算話好飽啦。
－－－－－－－－－－－－－－－－－－－－－－－－－－－－－

心斎橋好似旺角咁熱鬧呀！
－－－－－－－－－－－－－－－－－－－－－－－－－－－－－－
原本我地想食福太郎的大阪燒，
但去到已經滿座，師傅唔收食客啦，
我地唯有失望而回啦。
(之後係梅田終於食到去大阪玩 之 Day4b (奈良,進擊的鹿,梅田Grand Front Osaka))

大阪周街都係汽水機，
然後我地就買罐野飲 填補下失落的心情。

－－－－－－－－－－－－－－－－－－－－－－－－－－－－－－－－－－－
食唔到大阪燒，我地就食章魚燒啦！
店名非常複雜叫做蛸焼依屋文左衛門
地址：大阪府 大阪市中央区 千日前 1-8-24
間鋪頭都係得當地人幫襯，可能門面太頹啦。

我地叫左章魚燒，300円，熱辣辣，好味道！
－－－－－－－－－－－－－－－－－－－－－－－－－－－－－－－－－－－－－－

食完野口渴又禁左支野飲，
我地特登買左罐完全唔知咩的野黎飲，
原本以為會係D古怪味的飲品，
點知係罐好正常、幾好飲的果汁 (但始終都唔知咩果汁黎 lol)
－－－－－－－－－－－－－－－－－－－－－－－－－－－－－－－－－－－－－－

然後我地番酒店的時候發現附近有間超級市場叫做Foodium,
而且係24小時營業！
地址：大阪府大阪市中央区東心斎橋1-5-9

買左支椰子水係酒店飲
 買左盒壽司for聽朝的早餐。
－－－－－－－－－－－－－－－－－－－－－－－－－－－－－－－－
最後我地仲係7仔買左D宵夜食！(不停食 lol)

男朋友買左炸雞肉198円，佢話好味。

我買左布甸食。

仲買左飯團for聽朝的早餐！

Day1 完～
下篇講係Universal Studio Japan 玩左D乜！