11月2日：棧貳庫KW2 -> 駁二藝術特區 -> 双妃奶茶 -> 永和小籠包 -> 鴨肉珍 -> 瑞豐夜市
同閨蜜想去好多年嘅旅行，終於都成團啦！
雖然係五缺一，
難得四個夾到時間都去住先啦。
因為Kathy去咗台東做研究，
所以我哋就約咗一齊去高雄玩，
入禁區之前，
我就去Root 98度食個早餐先。
當年AE嘅CX卡有得去Root 98度order免費套餐，
所以我都拎埋個著數先上機。
我哋今日搭10:45am港龍航空去高雄，
機票我哋係TravelLiker度買，價錢係HKD$1701，
(後記：港龍航空已經係2020年10月21日因為疫情而停運咗啦！)
另外，我哋仲加咗CHUBB安達旅遊保險HKD$143，
同埋TravelLiker航班延誤補償保險HKD$16＋17，
如果班機delay 3個鐘以上會賠HKD$500。
今次嘅閘口喺501，位於勁遠嘅北衛星客運廊，
要搭接駁巴士先黎到。
(後記：北衛星客運廊而家叫做T1衛星客運廊，呢度嘅閘口由501至510改咗做13至22，
2022年11月1日仲啟用咗天際走廊接駁黎呢度，唔洗再搭接駁巴士啦，
詳細實測睇呢段片啦)
見到港龍嘅Logo好有歷史痕跡呀。
架機係A320，
大家仲記唔記得港龍嘅座位係冇螢幕架，
要download港龍嘅app StudioKA，然後用機上Wi-Fi去睇片！
疫情前DBS Mastercard可以係機場禁區的RELAY書店換領$15以下的雜誌一本！
見佢有支cream送就換咗呢本Jessica雜誌，
莫講話DBS嘅著數，而家機場冇哂呢啲有贈品又平嘅雜誌賣啦。
起飛啦！
我哋3個係香港飛去高雄再會合Kathy。
機程只有1小時40分鐘，
但飛機餐都有飯食呀。
話咁快就到咗高雄啦，
落機就見到呢個貼滿包裝紙嘅板，
全部都係唔比帶入台灣境嘅產品，
大家要注意啦。
黎台灣見到設計好靚嘅悠遊卡又忍唔住買啦，
呢張全部都係高雄熱門嘅景點嘅圖案。
自從呢個trip就愛上咗呢支蜜蜂故事館出嘅蜂蜜檸檬水，
蜜蜂同檸檬都好濃！
好飲到我哋一人買一支，
見到我哋四隻手就知道我哋四個係高雄合體啦。
我哋第一個行程就係搭捷運到西子灣站，
去棧貳庫KW2呢個地方，
係台灣最大嘅活化舊倉庫，
日治時期係存放砂糖、輸運出口的倉庫，
曾經被美軍轟炸損毀。
我哋黎棧貳庫KW2就係為咗呢個純白色旋轉木馬，
好可惜呢個木馬係2023年11月尾就已經清拆咗啦。
送上一張調咗色嘅四人合照比大家，
全白色嘅木馬真係好靚好打卡，
清拆咗真係好可惜！
打完卡先至認真行下棧貳庫。
棧貳庫入面有好多商店，
好岩大家買下手信呀。
外面仲有小食檔添。
我哋唔係好肚餓，
只係買咗條腸仔咬下。
第二站就黎咗棧貳庫附近嘅駁二藝術特區，
駁二呢度以前係一堆倉庫，
而家就活化成人文藝術發展嘅基地。
呢度係B7&B8倉庫，
有哈瑪星台灣鐵道館，
鐵道館前面係駁二線小火車。
一家大細可以黎呢度坐駁二線小火車。
行行下見到呢座高雄港牌樓，
係1982年興建，因為當年呢度嘅碼頭係屬於管制區，
所以就起咗個牌樓。
呢個巨大嘅變形金剛係駁二藝術特區嘅地標之一。
呢棟建築物上面嘅壁畫都畫得栩栩如生，
模仿駁二車站嘅樣貌。
駁二藝術特區嘅另一個地標，
用貨櫃整成嘅巨型藝術裝置。
之後就行到黎C6至C11嘅一堆倉庫群，
商店同餐廳都係集中係呢個area。
呢條巷仔竟然整咗個韆鞦，
勁打卡。
呢度嘅巷仔真係好多藝術裝置比人打卡。
呢座建築物嘅牆上放咗幾個狗嘅雕塑。
再行遠啲就黎到大義公園，
呢度又有個好打卡嘅藝術裝置。
全部都係用凳砌成架。
仲可以行入去打卡架。
最入面就冇咁鮮色，
打卡就冇咁靚。
跟住我哋就行去鹽埕埔捷運站附近嘅双妃奶茶，
地址：台灣高雄市鹽埕區新樂街173號
行咗成日要飲返杯廢水呀。
双妃奶茶係高雄最出名嘅奶茶店之一。
當年的menu，
加珍珠係免費架。
已經唔記得咗我哋叫咩奶茶啦XD
之後我哋仲去埋附近嘅永和小籠包。
地址：台灣高雄市鹽埕區鹽埕街35號
永和小籠包係條小巷度，
好local feel呀。
我哋叫咗兩籠小籠湯包，TWD$60一籠。
我哋同奶茶＋小籠包影張合照先。
食開就唔好比佢停，
下一站就黎咗鴨肉珍。
地址：台灣高雄市鹽埕區五福四路258號
逄星期二休息！
鴨肉珍係米芝蓮推介餐廳，
已經開業超過60年。
我哋叫左兩碗鴨肉飯、綜合下水湯、野菜。
食完就返酒店休息啦。
休息完之後，我哋搭捷運到巨蛋站，
黎咗瑞豐夜市。
我哋又飲野啦。
買咗杯芋頭牛奶。
仲買咗呢間廟東老街嘅菱角酥。
都炸得幾靚喎。
我哋有個閨蜜黎唔到一齊旅行，
見到呢檔狗狗衫，
就買返件手信比佢隻狗狗啦。
瑞豐夜市好大好好行，
都無影啲咩相，
最後返到捷運站搭車返酒店都比間賣衫嘅吸引咗入去行XD·
Day1完！
旅遊日期：2019年11月2日 - 2019年11月4日
=========================
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
《快閃高雄閨蜜遊》
0 comments