～今日的行程～
6月30日：酒店早餐 -> 下龍灣一日遊 -> 天宮洞 Động Thiên Cung -> 玩獨木舟 -> 下午茶：Cafe Giảng (蛋咖啡) -> 晚：Bun Cha Ta (河內菜) -> 腳底按摩
今日我地會join 一日遊去下龍灣 Ha Long Bay，
8點鐘就要上旅遊車，
Hanoi Marvellous Hotel & Spa嘅酒店早餐，
我地遲啲會有篇blog review間酒店。
除左自助餐之外，
仲有menu可以落order，
我叫左Pho越南河粉食。
最令我估唔到嘅係早餐竟然有甜品食，
生果方面最特別係有熱情果同山竹拎！
食完早餐仲有少少時間，
我地去Circle K便利店買左啲零食做早餐，
我揀左呢個Nam Phung的Crispy Rice Cake，肉鬆飯焦，VND$21,000。
安迪就揀左呢盒Nhat Anh的Baked Mung Bean Cake，VND$40,000，
係綠豆糕黎架。
之後就上旅遊車啦，
綠色衫係導遊，
佢由酒店帶我地行去前面架旅遊車。
好典型嘅越南街道，
四圍都係電單車。
呢個一日遊我地係Klook度book，
原價係HKD$274一個人，
扣除優惠碼同積分之後，係HKD$243.3。
旅程嘅第一站係廁所/休息/購物站，
我地就買左杯越南咖啡醒醒神先，VND$45,000，
因為要搭3個幾鐘嘅車去碼頭呀 (雖然都係訓足全程)。
終於黎到Tuan Chau International Marina碼頭啦，
我地會係呢度搭船遊下龍灣。
張船飛原價要VND$40,000，
不過呢個day tour係包埋船飛架。
原來遊下龍灣嘅船係咁大架。
呢架就係我地要坐嘅船啦。
入到黎好似去左船餐廳咁，
張張枱都鋪哂枱布，
放哂碗碗碟碟。
我地出發啦！
下龍灣有接近2000座小島，
係1994年下龍灣被聯合國教科文組織列入世界遺產名錄。
架船開左無耐就上菜，
有炸春卷、薯條、青瓜，
船上嘅午餐都係團費包埋架。
船上嘅濕紙巾竟然寫住National Airlines，
究竟我係搭緊船定係飛機呢？
同啲小島越黎越近啦。
下龍灣大部分都係石灰岩嘅島嶼。
其實好多島都係好細舊，
原來呢度嘅島係經歷左5億年而形成架。
終於上海鮮啦，
有魚、蝦同魷魚，
碟薯條真係有啲格格不入。
仲上左碟雞肉。
食野嘅時候都不忘留意下窗外嘅景色，
隨時會有特別嘅小島係你隔離！
呢個係下龍灣最出名嘅鬥雞石，
係下龍灣嘅標誌之一，
每架觀光船都會駛過黎停一停比遊客影相。
香港嘅小島係比較平坦，
而下龍灣呢度嘅島普遍都係好高，
好多懸崖峭壁。
我地上左船嘅上層影相，
係360度都被小島包圍住。
影下相打下卡先。
被群島包圍住嘅感覺都好壯觀。
下一站黎到Dau Go Island，
我地會落船去睇鐘乳石洞，
見唔見到圖中有個藍色牌匾？
鐘乳洞嘅入口就係個度啦。
行左唔知幾多層樓梯終於黎到藍色牌匾，
我地要行嘅鐘乳石洞就係Động Thiên Cung 天宮洞。
呢個係天宮洞嘅地圖，
佢嘅面積有3000平方米咁大。
係呢度望返去我地架船。
呢度嘅景色都好靚呀。
我地入去天宮洞啦，
一入黎就覺得好似阿拉丁個洞，
不過阿拉丁個個洞係沙黎嘅。
天宮洞係11萬至70萬年前就形成架啦，
黎呢度好似置身於富麗堂皇嘅皇宮，
所以就叫做天宮洞，天上嘅皇宮。
第一次參觀鐘乳石洞真係覺得好宏偉！
不禁讚嘆大自然嘅鬼斧神工。
洞入面每一part都好唔同，各有特色！
我最鐘意呢舊有啲幻彩色嘅石，
好夢幻嘅感覺。
我覺得啲鐘乳石有啲似歐洲啲教堂嘅外表，
例如米蘭大教堂啲尖頂！
呢度有水流出黎，
好有水簾洞嘅感覺，
唔知呢度有冇孫悟空呢？
呢個洞嘅樓底好高，
離開個洞度個陣望返落去，
我諗有幾層樓咁高！
出口望出去嘅景色都好靚。
睇完鐘乳石洞之後，
我地就係下龍灣度玩獨木舟kayaking。
我地都係第一次玩獨木舟！
希望我地唔會反艇啦。
係下龍灣群島之間玩獨木舟係好難忘架。
獨木舟比想像中好玩，
當然係因為呢度咁靚而有加成啦。
玩完獨木舟就要上船回程啦，
返到碼頭我地就買左杯蔗汁飲，VND$20,000，
今日真係曬足全日呀。
估唔到碼頭度有個Tuan Chau Water Puppet Theater，
有得睇越南嘅傳統文藝表演 - 水上木偶戲，
有一千年嘅歷史。
今次快閃太少時間，
將來再黎越南睇下有冇機會睇啦。
之後我地就坐旅遊車返河內，
3個鐘嘅車程有個中途落車嘅休息站，
呢度係一個雕塑品工場。
呢度嘅雕塑品都幾靚，
唔知我將來嘅大宅會唔會有個花園可以放雕塑品呢？
我地返酒店換件衫就出去覓食啦，
黎左河內最出名嘅咖啡店 - Cafe Giảng。
地址：39 Nguyen Huu Huan Hoan Kiem
呢度嘅座位都係越南style係比教矮嘅。
Menu有好多款式嘅咖啡，
而必飲嘅就係Egg coffee 蛋咖啡啦。
蛋咖啡係由呢間Cafe Giảng係1940年代發明，
當時奶短缺，
於是老闆就用蛋黃代替奶黎沖咖啡，
點知大受歡迎呀。
由於間cafe無咩冷氣太熱，
我地叫左兩杯凍嘅蛋咖啡，VND$25,000，
但其實熱嘅先係最原汁原味！
蛋咖啡嘅口感好滑，
唔知係咪因為凍飲，
所以冇乜蛋味，
咖啡味都淡。
飲完咖啡我地就直落食晚餐啦，
黎左呢間食河內菜嘅餐廳 - Bun Cha Ta。
地址：21 Nguyen Huu Huan Street Old Quater
呢間餐廳都係食「奧巴馬粉」，
姐係Bún chả 炭燒豬肉檬粉，
係2016年時任美國總統奧巴馬到訪河內食左炭燒豬肉檬粉之後，
呢款菜式就多左個名叫做「奧巴馬粉」啦。
我地又飲Egg Coffee蛋咖啡啦，
因為呢間餐廳個冷氣勁啲，
所以就試下熱嘅蛋咖啡啦。
炭燒豬肉檬粉終於黎啦，
白色個碟就係檬粉，
炭燒豬肉就係碗好似湯咁嘅魚露入面，
食嘅時候夾少少檬粉點落魚露入面然後食。
我地叫左3款炸春卷，
分別有傳統炸春卷(入面係豬肉餡)、海鮮同雞。
我地覺得傳統最普通，
雞好食啲啲，
海鮮係最好食架。
另外，最特別嘅係，呢間餐廳嘅座位係類似日式咁樣，
要除鞋而且坐地下。
發現河內好多按摩鋪，
我地就決定求其入間試下，
就黎左呢間啦。
今日行左咁耐就整個腳底按摩啦，
價錢係VND$120,000半個鐘，
我地各自比左VND$50,000貼士比技師，試下呢啲地道按摩店都幾特別。
做完腳底按摩我地就返酒店休息啦。
旅遊日期：2019年6月29日- 2019年7月1日
=========================
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
《快閃河內》
0 comments