～今日的行程～
12月31日：Palacio Real de Madrid 馬德里王宮 -> 早午餐：Chocolatería San Ginés -> Plaza Mayor 主廣場 -> Parque del Buen Retiro 麗池公園 -> 午餐：Casa Lucharna -> 馬德里機場 (MAD) -> 蘇黎世機場(ZRH) -> 香港機場(HKG)
今日係《去西葡歎》嘅最後一日啦，
而我哋會係機上面倒數過新一年。
我哋今晚會搭7:40pm機，
所以都有半日時間繼續遊覽下馬德里。
我哋首先黎咗Palacio Real de Madrid 馬德里王宮。
今日嘅天氣都好好呀。
馬德里王宮係西班牙國王費利佩六世 Felipe VI住嘅王宮，
係1735年建成。
Day6係天台bar都見到馬德里王宮，
佔地約1,450,000呎，有3,418間房間，
係歐洲最大的王室宮殿。
時間嘅關係，我哋冇入去王宮參觀，
只係喺外面影相。
安迪好chok喎。
馬德里王宮前面有個Plaza de Oriente 東方廣場，
花園入面有噴泉同埋Monument to Philip IV of Spain 國王菲利普四世嘅騎馬雕像。
終於行到黎馬德里王宮的正門，
超多人呀。
我哋繼續沿住王宮嘅外圍行，
呢度有鐵欄，
可以望到王宮入面。
入面係Plaza de la Armería 兵器廣場。
王宮嘅隔離就係Catedral de la Almudena 阿穆德納聖母主教座堂，
由1879年開工，直到1993年建成啟用。
教堂門口嘅雕像係時任教宗若望·保祿二世 Pope John Paul II，
教堂當年由時任教宗祝聖下正式啟用。
我係門口影張相就離開啦。
之後我哋就黎咗呢間有130年歷史嘅Chocolatería San Ginés食Churro西班牙油炸鬼，
總店位於僻靜嘅小巷入面。
地址： Pasadizo de San Ginés, 5, Centro, 28013 Madrid
總店對面仲有一間分店，
人太多嘅話可以黎分店。
我哋就去咗總店嘅地牢個層。
我哋每人叫咗個Chocolate Con 6 Churros，€4.3，
仲平過 Day1係巴塞隆拿競技場食嘅頹Churros。
我哋唔客氣啦。
好鍾意呢度深綠色嘅設計。
之後我哋就黎咗Plaza Mayor 主廣場，
呢個廣場係1619年建成，
之後遭遇過三次重大火災，
所以而家見到嘅主廣場係1790年大火重建的。
主廣場中央有個國王Philip III of Spain 菲臘三世的青銅騎馬雕像。
喺漫長的歷史上，主廣場一直係舉行各種公開活動嘅地方，包括市集、鬥牛、足球比賽，仲有公開處決。
下一站，我哋黎咗Parque del Buen Retiro 麗池公園，
佢係馬德里中心最大的公園。
我哋首先行玫瑰園。
玫瑰園中間有個噴泉。
玫瑰園擁有130個不同品種的玫瑰，
玫瑰花期係五至六月，
所以我哋當時見到嘅花都唔多。
呢座係Palacio de Cristal 水晶宮，
係1887年建成，
原本係一座溫室，
而家用黎舉辦藝術展覽。
呢個靚位同水晶宮影張合照啦。
係2021年，麗池公園同普拉多大道Paseo del Prado一齊被列入聯合國教科文組織世界遺產名錄。
我哋入去水晶宮參觀啦。
當時展覽緊Hassan Khan的The Keys to the Kingdom。
呢個展覽掛咗好多旗幟，
每個旗幟都係獲得政權的元素之一。
最吸引到我就係呢個好似Pepe the Frog，
令我聯想起當時正值2019年的香港。
水晶宮全玻璃的設計都好深得我心。
前面呢個係Estanque del Retiro 退休池，
係一個人工池黎架，
池邊有國王Alfonso XII 阿方索十二世的騎馬雕像。
行完麗池公園，我哋就去搵食啦，
係西班牙都不難發現一堆人係餐廳門口拎住杯酒聚集。
我哋黎咗呢間餐廳Casa Lucharna (已結業) 食午餐。
餐廳細小，但都幾乎坐滿客人。
我哋叫咗支Martivilii的D.O. Rueda產區嘅白酒，€17，
用當地著名的Verdejo提子釀造。
用當地著名的Verdejo提子釀造。
餐廳見我哋開咗支酒，又或者見我哋開白酒又冇叫海鮮，
就請咗我哋食4隻蝦。
我哋order咗Iberian Ham and bread with tomato and olive oil，€17，
係伊比利亞火腿同埋橄欖油麵包加番茄蓉醬。
Scrambled eggs with blood sausage and crispy potato straws，€17，
血腸炒蛋係西班牙一道傳統嘅Tapas。
"Callos a la Madrileña" (Madrid-style tripe)，€11，
馬德里式燉牛肚，
係馬德里最出名嘅傳統名菜之一，
同其他燉牛肚嘅不同之處係，德里式燉牛肚係唔會加鷹嘴豆或任何豆類。
連埋€0.6的Pan，姐係服務費，
總共食咗€56.6。
我哋返酒店拎行李，然後就黎馬德里機場 (MAD)啦，
去到機場記得搞退稅。
去呢啲DIVA kiosk服務機度申請退稅就ok啦。
馬德里機場入咗閘之後都冇咩好買。
最搞笑係有個Starbucks on the go自助沖咖啡。
買返杯黎玩下先XD
我哋搭瑞士航空(SWISS)飛去蘇黎世機場轉機再飛返香港。
呢架係Airbus A220-100，
機程只係2h15m，
所以係細機，
冇機上娛樂。
兩排座位share一個螢幕睇片。
準備離開馬德里啦。
雖然機程只有2個鐘多啲，
但都有野食同飲品提供。
呢個係咩包黎架呢?
仲有瑞士航空臨降落都會派嘅朱古力。
估唔到搭瑞士航空，落機冇空橋接駁Terminal，
要行樓梯落機。
要坐接駁巴士去Terminal。
話說我哋預計9:55pm降落蘇黎世機場，
然後搭10:40pm的飛機，
姐係轉機的時間只有45分鐘，
時間十分緊湊，
當時貪平買機票，冇擔心過唔夠時間轉機！
最後早咗19分鐘降落蘇黎世，
下一班機又delay咗24分鐘，
順順利利轉機呀。
第二程機係Boeing 777-300ER，
機程係11h40m，
終於有機上娛樂啦。
搭飛機過新的一年係點架呢?
之前幻想機長會唔會同大家一齊倒數，
最後機長只係起飛前同大家預祝happy new year，
而就到12點，機長都冇同大家講野！
甚至其他乘客都冇人倒數！
點知我望出窗外，
都係閃爍嘅燈光(或者係煙花?)，
睇黎係地面的人慶祝的燈光！
好靚呀！
睇返地圖我哋當時係奧地利上空。
2020年嘅第一餐就係飛機餐啦XD
仲派咗支瑞士嘅Henniez礦泉水。
我叫左紅酒，
估唔到會成支比你，
係法國Val d'Orbieu酒莊的Mythique系列嘅Syrah Grenache紅酒。
我哋仲order埋白酒，
又係細細支上，
係瑞士Les Merveilles酒莊的Chasselas de Romandie白酒。
呢個係我個2020第一餐，
食完宵夜我哋就訓覺啦。
出面天光啦。
2020年嘅第二餐都係瑞士航空的飛機餐XD
7日嘅《去西葡歎》就圓滿結束，
下篇blog會介紹我哋係馬德里住嘅酒店!
旅遊日期：2019年12月25日 - 2020年1月1日
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
0 comments