～今日的行程～
12月25日：機場世貿中心 -> 香港機場 -> 蘇黎世機場轉機 -> 巴塞隆拿機場 -> Ayre Hotel Rosellon -> 早午餐：Holiday Bar & Restaurant -> 奎爾公園 Park Güell -> 米拉之家 Casa Milà -> 巴特略之家 Casa Batlló -> 維森斯之家 Casa Vicens -> 西班牙廣場 Plaza of Spain -> 巴塞隆拿競技場Arenas de Barcelona -> 晚：Casa Lolea
呢個trip我哋會去7日西班牙＋葡萄牙過聖誕！
時間好短，而且係聖誕節，
出發之前我哋黎左機場世貿中心7樓嘅會所食個dinner先，
佢店名其實叫做近水樓台(寫blog個陣已經執咗啦)，
當時張AE CX可以黎呢度食免費套餐。
佢成層嘅裝修都好有氣派。
當時嘅安迪好瘦XD
臨去歐洲前食返餐中菜。
當時係12月24號，
個個食西式聖誕大餐，
而我哋就食中菜XD
我哋會搭瑞士航空(SWISS) 12:20am去蘇黎世轉機，
6:10am到達蘇黎世，機程係12h50m，
轉機時間只有一個鐘，
然後7:10am飛去巴塞隆拿，9:00am到達巴塞隆拿，機程係1h40m。
來回機票係Lufthansa漢沙航空嘅官網買，
回程都係搭瑞士航空，由馬德里出發，蘇黎世轉機返香港，
另外仲有張單程由香港去上海嘅國泰機票，
價錢總共係HKD$3741，非常抵！
我哋之前《西歐五國星馬畢業遊》喺瑞士返香港都係搭瑞士航空。
每個座位都有個小枕頭同埋毛毯。
座位前面有兩格比人放野，
長途機特別多野放架嘛。
搭econ都有menu睇實在要加分。
有晚餐同早餐食。
飲品方面有酒、汽水、果汁、水，
種類仲唔少添。
飛機餐上面用咗5種語言：英文、德文、法文、意大利文、羅曼什語，
同你講請慢用。
左上係雞胸肉配青瓜及古斯米沙律，
中間係牛油、芝士，
右面係朱古力莓果雪芳蛋糕，
下面有個餐包，
安迪嘅主菜係泰式青咖喱雞飯。
我就揀左蘑菇意大利雲吞配番茄醬。
訓左幾個鐘之後就食早餐啦，
左上係乳酪，
中間係牛油、芝士、餐包，
右面係生果，
主菜係奄列、雞肉腸、薯角、車厘茄。
臨落機仲有粒朱古力送添。
對上一次黎蘇黎世機場已經係兩年前啦，
機場啲嘢依然係好貴。
轉機時間只有一個鐘，
我哋拿拿臨行去登機閘口啦。
由蘇黎世飛去巴塞隆拿嘅機程只係1h40m，
所以架機都好細呀，
座位前面係無獨立嘅機上娛樂。
但有個mon仔係頭頂上面。
起飛之後個天開始日出啦。
雖然機程個幾鐘，
但都有個巨大嘅牛角包食下。
窗外嘅雪山好靚。
係聖誕節嘅日出呀。
終於見到個咸蛋黃啦，
係我哋呢個旅程嘅美好開始呀。
臨降落又派左粒朱古力。
我哋即將降落巴塞隆拿啦。
西班牙嘅海岸真係好靚。
用咗15h30m終於由香港黎到巴塞隆拿！
巴塞隆拿嘅機場都好靚。
我哋黎呢間Ayre Hotel Rosellon酒店寄存行李、換件衫、化個妝就去食野啦
聖誕節嘅第一餐就黎咗呢間Holiday Bar & Restaurant。
地址：Carrer de la Marina, 292, L'Eixample, 08025 Barcelona
間餐廳嘅裝修幾modern，又有啲西班牙嘅元素。
黎西班牙必須要試嘅就係Tapas啦，
Tapas係指前菜小食，都係細細碟嘅，
通常都會配埋酒一齊食。
我哋order呢個Tapas係Chorizo西班牙香腸，€5.5。
Tapas通常都唔會叫一碟咁少，
呢碟係Shrimp with garlic，€7.95。
主菜我哋叫咗呢個Fideguay，€11.9，
源自西班牙瓦倫西亞自治區，
係Paella西班牙海鮮飯嘅一種，
不過就唔係用飯，而係用麵條，
呢個Fideguay成個鐵鍋上，好大碟，
上面法蘭克福腸、火腿、芝士、煙肉、蘑菇等等。
當然唔少得叫返杯Sangria西班牙水果酒啦。
食完個brunch仲未夠鐘check in房，
我哋就去咗Ayre Hotel Rosellon嘅頂樓。
我哋揀呢間酒店就係因為可以望到聖家堂Sagrada Família。
呢度影相嘅遊客唔多，
可以慢慢影呀。
我都幫安迪影返張靚相先。
當然唔少得同安迪影返張合照啦！
我哋book咗聽日參觀聖家堂，
下篇blog再詳細介紹聖家堂。
我哋而家出發去奎爾公園 Park Güell啦，
沿路見到巴塞隆拿依山而建嘅樓景好靚。
行咗咁耐，終於見到奎爾公園嘅門口啦。
入場費係€10，
大家記得預先喺官網買好奎爾公園嘅門票，
否則現場好可能會買唔到飛。
奎爾公園嘅地圖，佔地17.18公頃咁大。
奎爾公園由西班牙加泰隆尼亞著名嘅建築家高第Antoni Gaudí設計，
係1914年建成，
1984年被聯合國教科文組織列入世界遺產名錄。
奎爾公園原本係住宅區黎，
但最終只係起咗兩座屋，
1904年出售，但都冇人買，
於是高第就自己買咗佢，
1904至1926年高第全家都住喺呢度。
呢個奎爾公園嘅建築風格別樹一格，
好似走入咗童話世界入面。
呢條色彩繽紛嘅蜥蜴龍叫做"el drac"，
係奎爾公園最著名的地標，
用彩色馬賽克砌成嘅。
close up一下條蜥蜴龍比大家睇下。
樓梯上面就係百柱廳「希臘劇場」啦。
呢度除咗有蜥蜴龍，
仲有蛇，
都係用彩色馬賽克砌成。
我哋行到黎正門嘅area，
呢度有兩座屋仔，
好似一間糖果屋，
屋頂都係用咗馬賽克砌成。
另一間屋仔，
舊時係呢個大宅(公園)嘅reception黎。
入面而家係精品手信店。
呢啲高架橋以前係俾馬車行架，
方便載客人由公園入口去山頂。
呢啲拱形迴廊好特別。
呢個公園真係好多打卡嘅位。
參觀完高第設計嘅奎爾公園，
我哋就繼續睇埋高第其他嘅作品，
呢個係米拉之家 Casa Milà，
由高第喺1912年建成，
因為富豪Pere Milà非常欣賞高第設計嘅巴特略之家Casa Batlló，
而請高第為富豪嘅結婚而設計。
1984年被聯合國教科文組織列入世界遺產名錄。
我哋無入去參觀，
只係喺門口影相。
之後就黎到巴特略之家Casa Batlló，
原建築物係1877年建成，
由1904年被高第重新設計，
2005年被聯合國教科文組織列入世界遺產名錄。
好似進入咗科幻故事嘅世界咁。
我哋又係無入到去參觀，
只係喺門口影下相。
今日最後打卡嘅高第作品就係維森斯之家 Casa Vicens，
係1885年建成，
2005年被聯合國教科文組織列入世界遺產名錄。
維森斯之家係高第受到印度、波斯(現為伊朗)、日本藝術的啟發，
而加入東方主義的作品。
呢個維森斯之家又橙又綠真係好有聖誕節嘅feel。
加埋聖家堂，我地今日睇咗5個高第嘅作品，
各有特色！
之後我地就黎到西班牙廣場 Plaza of Spain，
其實成個歐洲有好多個西班牙廣場架，
唔剩止西班牙先有，
呢個就叫做巴塞隆拿嘅西班牙廣場 。
呢個廣場以前曾係絞刑場，
1715年因為起城堡就拆走絞刑架。
1929年就為左世界博覽會興建成廣場啦。
西班牙廣場最突出就係呢棟威尼斯雙塔Venetian Towers，
都係為左世界博覽會1929 Barcelona International Exposition而起嘅。
廣場最中心就係呢個噴泉Fountain of the Plaza de España啦，
都係為左世界博覽會而起。
西班牙廣場仲有呢座巴塞隆拿競技場Arenas de Barcelona，
係1900年建成，
原本係鬥牛場，係2011年就改建成商場啦，
我地去呢個商場嘅頂樓觀賞風景。
如果係商場入面上去頂樓係免費，
喺商場外面搭lift直接去頂樓就要比€1.5，
我地就梗係喺商場入面上去頂樓啦。
頂樓除咗係觀景台之外，
仲有啲餐廳係度。
頂樓係露天嘅，
當時仲有啲聖誕裝飾。
觀景台最正嘅係可以睇到哂成個西班牙廣場。
當時日落都好靚呀。
仲見到巴塞隆拿國家宮Palau Nacional，
又係為左世界博覽會1929 Barcelona International Exposition而起嘅展覽館，
而家係加泰羅尼亞國家藝術博物館 Museu Nacional d'Art de Catalunya。
推薦大家黎Arenas de Barcelona嘅頂樓睇日落。
之後我哋就行下個商場，
見到呢間BOKA有Churro西班牙油炸鬼食，
就買黎試下。
地址：Gran Via de les Corts Catalanes, 373 - 385 Arenas, 08015 Barcelona Spain
冬天喺西班牙食暖笠笠嘅Churro就適合不過啦。
行完商場出返黎就已經天黑啦。
晚上我就黎咗好出名飲Sangria西班牙水果酒嘅Casa Lolea。
地址：c/ Sant Pere Més Alt, 49, 08003 Barcelona
餐廳入面嘅座位唔多。
一般嘅Sangria都係紅酒加唔同嘅生果粒，
而呢度就有5款Sangria咁多。
我就叫咗Lolea N°5 Rosé €5，就用粉紅酒就沖嘅，
安迪就叫咗最classic嘅Lolea N°1 €4.5。
我哋就叫咗呢碟Prawn "Gilda", Quail Egg, Cherry Tomato，€2.3，
有橄欖、蝦、鵪鶉蛋、車厘茄。
左手面係"Coca" bread with tomato，€4.9，
望落去蕃茄、鹽、麵包，好似好普通，
其實係加泰隆尼亞嘅特色菜黎架，
將蕃茄切碎放係麵包上面，
再加少少鹽，就食得啦。
中間係Creamy scrambled eggs, mushroom & baby garlic，€8.7，
就係蒜蓉蘑菇炒蛋。
右上係Iberian acorn fed ham，€11.9，
黎西班牙梗係要試下伊比利亞火腿啦。
呢碟係Steak tartar with herbs butter，€10.5，
唔肯定係咪呢碟加咗額外嘅包，要 €1.5。
呢碟係Confit cod fish with humus, spinach, and pilpil mayo，€3.9。
呢碟係Marinated salmon binis with yogurt & truffle honey，€4.8。
總共食咗€58，
連個收錢兜兜都係用魚罐頭，
好有西班牙特色。
返酒店經過呢間Coaliment超級市場，
就入去買下野。
左面四盒係巴塞隆拿嘅朱古力牌子Chocolate Amatller，€3.99一盒，買咗4款口味黎試下，
右面係TRESemmé嘅髮膜，€4.95，
隔離個支係水，€0.62，
下面係一排6支Cacaolat，€4.65，係西班牙嘅朱古力奶。
仲經過左間手信店，
買咗6張明信片。
巴塞隆拿嘅聖誕節正日都好多鋪頭有開，
聽朝會去聖家堂參觀。
旅遊日期：2019年12月25日 - 2020年1月1日
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
0 comments