Day2的行程：

Day2: 酒店Infinity Pool ->金沙購物中心 食lunch+ shopping -> 賭場玩兩手 ->check out -> Ritz-Carlton 酒店check in -> Orchard Road -> 牛車水 -> Maxwell Food Centre ->酒店

＊匯率當時大約係1兌5.579

－－－－－－－－－－－－－－－－－－－－－－－－－－－－－－－－－－－
起身之後，我地就淥左Day1係超級市場買的Cup Noodles 叻沙味杯面食。



我地食開的合味道入面都無調味料包，呢個叻沙味就有啦。
佢D叻沙味道麻麻地，麵質都麻麻地。

食完早餐我地就換泳衣上酒店頂層的Infinity pool度游水啦。
詳細請睇：去新加坡嘆 之 住宿篇 (Marina Bay Sands,無邊際泳池)

游完水我地就check out, 因為我地Day2會住第2間酒店。

酒店下面就係金沙購物中心同埋賭場。

首先我地去賭場門口度寄存行李，然後去食lunch，之後再番去賭場玩兩手！

我地去左金沙購物中心的food court, Rasapura Masters度食野。
地址：2 Bayfront Avenue, The Shoppes at Marina Bay Sands ,B2-50 Canal level

新記 海南雞飯 SGD$7.2
見佢有啡色皮的海南雞飯，所以就叫黎試下，但係我都鐘意普通黃色皮的海南雞多D姐。
另外，買緊的時候，店員都好熱情同我傾計haha。

黃亞細肉骨茶 SGD$10.9
黎新加坡點都要食肉骨菜 呢間唔係出名的 但都ok 都好有胡椒味

食完野見到Bath & Body Works 同埋 Sephora就忍唔住入去行下啦！
Bath & Body Works
地址：B2-42, Canal Level The Shoppes at Marina Bay Sands
Sephora
地址：B2-43, Canal LevelThe Shoppes at Marina Bay Sands
係Bath & Body Works 買左5支消毒酒精，SGD$14。
佢地D消毒酒精非常之香！而且有好多味揀！簡直花多眼亂。

  係Sephora剩係買左支唇膏，Tarte amazonian butter lipstick #Coral Blossom，SGD＄26
呢支Tarte的唇膏好潤，唔洗查潤唇膏都可以直接查呢支唇膏。

行完街後就去左賭場玩，新加坡的賭場每個人都要check左證件先可以入場的，
因為本地人入賭場要收入場費，外國人就免費入場。
所以入場都要分新加坡人同外國人兩條隊入去。

我地係第一次去賭場玩，所以都係玩下老虎機同大細。
最近我地仲去埋澳門玩，發現新加坡金沙的賭台相比澳門金沙係玩得細D，岩哂我地D新手。
此外，新加坡金沙有汽水機任斟，支裝水周圍都係，大把任你拎。
相反，澳門金沙無汽水飲，支裝水只係放係賭台旁邊。

最後輸左SGD$16.65，唔多，只係過下手癮，見識下，haha。

然後我地拎番D行李就搭的士去 Ritz-Carlton。
其實Marina Bay Sands同Ritz-Carlton好近，地鐵差一個站。
本身諗住行過去，但我地唔識行，所以就搭的士。

新加坡的的士真係不得了！佢地的外型好靚，有好多唔同款式同埋顏色！
唔似香港只有3隻色，得幾種款式。

我地坐呢架係白色的7人車，好大架。 我地當時影唔切架車，大概係咁的樣。

我地上車第一感覺係好似坐緊uber。

有雜誌睇！好豪華的感覺。

好寬敞，腳有好多位置擺，唔似香港的的士迫迫夾夾。

坐位好舒服！

瘋狂影相。

張圖from Google Map。好彩我地搭的士去Ritz-Carlton，原來要上個小斜坡先至去到酒店！
如果拎住行李行呢條路就會喊出黎。
我下篇blog會詳細講下間酒店係點！間酒店係surprisingly正！！！

之後我地就搭地鐵去Orchard Road烏節路 ION Orchard度shopping。
ION Orchard係新加坡的一個大型的shopping mall，有好多名牌買。
我地去左Charles＆Keith度買野，有小ck的稱號，係新加坡牌子，價錢唔貴！
地址：2 Orchard Turn #B3-58 ION Orchard
我地買左個袋仔，我男朋友用黎裝鑰匙、Usb線。 SGD$23.9，未計7%稅。

iPhone 6的case，個case旁邊都有一個Charles＆Keith的寫印左係度。
SGD$9.9，未計7%稅。
雖然個case幾靚，用左1-2個月，男朋友部電話個背面發現被個case刮花左，
之後佢就無再用個case啦。

太陽眼鏡 SGD$55.9

眼鏡兩邊仲有兩個細細的蝴蝶結。

眼鏡盒內仲有一個塵袋同說明書。
連埋稅，所有野總共買左SGD$89.7。
機場入面都有Charles＆Keith，而且係免稅的，但係款式就無咁多，貨又無咁齊。

ION Orchard仲有Aeropostale (香港無分店的美國服飾牌子)，
但入面D款麻麻地，好似online shop D款靚D，所以就無買到野。
地址：2 Orchard Turn, #B3-06 ION Orchard

然後我地去左Bengawan Solo，好出名的班蘭蛋糕餅店。
地址：2 Orchard Turn, #B4-38 ION Orchard
我地無買到班蘭蛋糕，打算臨走係機場先買，而且機場買唔洗稅平D。
所以我地買左D糕點試下先，幾好味的，價錢唔記得左，好似SGD$1件。

行行下肚餓，我地就去左B4樓的food court，Food Opera食代館度食野。
East Coast Lagoon的叻沙，SGD$5.5，唔錯！

之後我地搭地鐵去牛車水度行下，終極目標係去搵出名的天天海南雞飯！！

呢條係Pagoda Street，有好多精品手信賣。

仲保留住牛車水的舊建築

以下係我係牛車水買左的野！
林志源豬肉乾，買左SGD$15。我男朋友鐘意食豬肉乾，所以就買黎試下。

美珍香豬肉乾，買左SGD$9.3。香港都有美珍香，所以佢買少少試下有無分別，佢覺得同香港的美珍香差唔多。
佢仲覺得林志源同美珍香的味道都幾唔同，但係已經唔記得哂林志源同美珍香的分別啦，不過兩個佢都覺得好食！

扮Starbucks的merlion鑰匙扣，SGD$5有3個。
我好少送鑰匙扣….唔等駛的野做手信，但我覺得幾靚同特別，所以就買啦。

熊公仔，SGD$4。雖然係made in China，但質素好好，好軟熟，D毛又唔會甩，最重要好得意！
SGD$10 (around HKD$66)仲有3個添！性價比比淘寶個D公仔高(價錢平D，質素又好好多！)
之後我地就行去Maxwell Food Centre熟食中心，因為天天海南雞飯就係個度！

出地鐵站除左經過我岩岩行個條Pagoda Street外，仲要經過South Bridge Road先到Maxwell Food Centre，大概15分鐘的路程。

行完條Pagoda Street，就會見到Sri Marianmman Temple馬里安曼廟，係興都教寺廟，最吸引莫過於呢個樓塔，有好多唔同的彩色神像！

行完Pagoda Street就會見到呢度牛車水門，然後過大馬路。

一直直行，就到Maxwell Food Centre的時候，你就會見到另一個寺廟，呢個係佛牙寺。

終於去到Maxwell Food Centre，
當時已經7點半，天天海南雞話就話8點先關門，
但係我地去到已經賣哂，員工已經收緊鋪！！！
所以大家去食天天海南雞記得早D，而且星期一係休息的！

所以我地唯有試其他鋪的海南雞飯啦！

阿仔海南雞飯，兩個餐總共SGD$9.2，都幾好味，食唔到天天，食到呢個都唔差！

當時見到一個個大大隻的椰青 排哂係托盤收集架上，就引唔住買番個黎飲！
我地係汝湖飲品度買，SGD$3。外表係肉酸D，
但好大個，入面D椰汁滿到瀉，椰子肉又多，
香港D餐廳都搵唔到咁大個的椰青，大家黎呢度必飲！

食完我地就沿途行番去地鐵站(頭先好多風景都係回程先影haha)，
搭地鐵番酒店了。

Day2 完～

不知不覺呢個blog就一週年了，寫文的速度好慢，
事關返學好忙，開學無耐就midterm，midterm完就exam了，
exam完就sem break，接住要plan行程去旅行 去玩，haha。

寫blog主要目的唔係分享我去左邊度旅行，而係紀錄我去旅行做左D乜，
有時會唔記得旅行去左邊做左D乜，然後就睇番自己寫的blog，
影過的相，D記憶就會番哂黎。

(後記，當時係ublog出呢篇文係ublog成立一週年，
而家都已經寫左3年有多了，而家將ublog的文搬去blogger度，
因為ublog個網站太慢，導致我出文的進展拖慢好多。
另外，出黎做野之後寫blog時間真係多左，
仲開埋facebook同ig，無時無刻都可以分享旅行的故事！
之後寫blog都可以參考番，唔會成日都話唔記得左個陣係咩感覺。)

其他文章：
大家可以係menu bar度揀《去新加坡嘆》的其他文章
去新加坡嘆 之 Day1a (樟宜機場,電話卡,兌錢)
去新加坡嘆 之 Day1b (聖淘沙,環球影城,Vivo City)
去新加坡嘆 之 Day2 (金沙購物中心,ION Orchard,牛車水,Maxwell Food Centre)
去新加坡嘆 之 Day3 (Merlion,牛車水寄明信片,Garden by the Bay,機場shopping)
去新加坡嘆 之 住宿篇 (Marina Bay Sands,無邊際泳池)
去新加坡嘆 之 住宿篇 (Ritz-carlton Millenia)

《西歐五國星馬畢業遊》