6月16日：香港機場 -> 胡志明市新山一國際機場 -> 午：Bún Bò Huế Gia Hội (順化牛肉粉) -> Co.op Mart -> 晚：Làng Nướng Nam Bộ (越南菜) -> Bui Vien Walking Street (西貢酒吧街)
由於有親戚住係胡志明市，
所以細個個陣幾乎每年都會去一次越南玩。
旅遊日期：2018年6月16日- 2018年6月18日
屈指一算都已經十幾年冇返過越南探親，
心血來潮見我姨媽一年一度返越南，
於是我就買機票返去快閃3日探下親玩下，
今日會搭晨咁早嘅8:35am機，
4:30am就出門口搭車去機場，
琴晚只係訓左2個鐘，
好眼訓呀。
黎到機場，因為我地有國泰航空尊尚信用卡，
可以入去環亞機場貴賓候機室 Plaza Premium Lounge免費食下野！
有腸粉&魚蛋粉食！
所以可以係機場禁區的RELAY書店換領$15以下的雜誌一本，
$15以上就補番差價就可以啦！(按我申請)
所以我地都唔好嘥，每人換左本雜誌。
我地搭8:35am國泰航空去胡志明市，
機票係Fanfares度買，連稅每人係$1508。
終於都上機啦，
但話會delay 15-20分鐘！
第一次坐出口位 (其實係唔記得左online checkin而被迫坐)，
好處係隻腳可以伸長d，
唔好處係冇咩位放隨身物件、食飛機餐張枱好難平衡。
最後架機9:55am先至起飛 (delay左個幾鐘呀！)
我地今次坐的機型係Boeing 777-300ER。
原本以為坐出口位冇獨立的mon睇戲，
見人用先至發現 個mon係收埋左係椅邊，
仲搞左好耐先至識開，
好似大鄉里出城咁 哈哈。
飛機餐我揀左粥，
個粥有瑤柱，又幾好味。
呢個西式早餐好似成日出現。
11:00am越南時間到達胡志明市 (比原定時間10:15am遲左9個字呀)。
胡志明市的新山一國際機場 (Tan Son Nhat International Airport)。
當時香港特區護照仲未可以申請越南電子簽證e-visa，
所以我今次係用左BNO去胡志明市嘅。
話說係國泰Check in的時候，地勤會叫你出示visa的文件，
唔知係咪因為個地勤係新人，
佢見到我封visa確認信的國藉寫United Kingdom就以為我填錯，
我解釋申請的時候填 BNO，但最後出左United Kingdom，
於是地勤問佢隔離的同事，
個同事就解釋比地勤知國藉寫United Kingdom係正常架，
最後地勤就出boarding pass比我地啦。
當時特區護照仲未可以申請電子簽證，
所以非常多人係度等簽證，(而家申請落地簽證的人流比以前會少左)
當時等左成9個字先叫我名，
比USD$25就搞掂落地簽證啦，
然後就可以去隔離排入境過關啦。
之前同親戚講左10:15am到越南，
點知搞到12:20pm先至出到黎，
佢地等左勁耐呀。
胡志明市機場個接機大堂係戶外嘅。
之後我地就call Grab去酒店啦。
圖中應該係一家三口，
爸爸揸住架垃圾回收車工作，
呢d都係係香港見唔到的情景。
呢三日兩夜都住係Athena Boutique Hotel，
我地想住近市中心之餘又想住近親戚屋企，
於是就揀左間中間點的酒店啦，
遲d會寫個blog詳細介紹。
之後親戚就帶左我地去附近嘅呢間Bún Bò Huế Gia Hội食lunch。
地址：14 Đường Số 2, Phường 15, Quận 11, Thành phố Hồ Chí Minh
呢間餐廳做local生意，
都坐得幾舒服。
張餐牌全部都係越南文。
、唯有靠親戚翻譯啦。
我地就叫左Bún Bò Huế 順化牛肉粉，VND$40000。
Bún係米粉，
Bò係牛肉，
Huế就係順化，順化其實係位於越南中部的一個城市。
入面有牛肉、豬紅，
香港好似好少見到順化牛肉粉食。
親戚叫左Cơm Gà 雞飯，VND$40000，
Cơm係飯，而Gà就雞。
叫左Sữa Hạt Sen 蓮子奶，
味道似似地豆奶，好好飲。
食完野我地就前往親戚屋企啦，
發現好多戶都會養雞。
佢地養黎唔係食，
而係當係寵物，然後得閒就同鄰居鬥雞。
不時會有小販係門口經過賣野，
呢架車係賣菜同埋榴槤。
黎到越南緊係要飲越南咖啡啦，
親戚買左杯咖啡請我地飲，
天時暑熱，飲番杯冰凍的咖啡真係好正，
呢杯咖啡加左奶，甜得黎又保留香濃的咖啡味。
門口又經過一個小販，
親戚推薦食呢個Gỏi Khô Bò 牛肉乾沙律。
位小販落左好多種醬汁。
好似好好味咁。
Gỏi Khô Bò其實係青木瓜絲上面放d牛肉乾。
親戚冇介紹錯，
d醬汁撈埋d青木瓜同牛肉乾真係好好食。
之後我地就坐電單車出去啦，
咁岩捕捉到兩位可愛的小妹妹。
之後我地去左超級市場行下，
超級市場越文係Siêu Thị，讀音類似係 ‘少Tay’，
細個返越南好鐘去超級市場買零食，
所以就特別記得呢個越文點讀。
呢度好多外資的便利店、超級市場，
例如Family Mart、Big C、Circle K都見到有，
而呢間Co.op Mart係英國嘅。
呢間Co.op Mart得一層，唔係話好多野行。
見到沖左的阿華田，
唔知點解香港好似冇沖左的賣。
去超市都想買d香港冇的野做手信，
呢d黃色一盒盒嘅Bánh đậu xanh綠豆糕 以前食過都覺得幾好食，
d綠豆糕一入口即散成粉狀，好過癮，
買左2盒返香港啦。
越南d Phở即食麵都好好食，
係屋企都食到Phở越南河粉啦 (當然同餐廳食的冇得比啦)，
而且份量好細，起馬食兩包先夠飽。
除左Phở之外，仲見到好多款Hủ tiếu Nam Vang 金邊粿條即食麵，
Nam Vang係柬埔寨的首都金邊，
金邊粿條都係越南好常見的菜式。
之後我地又坐電單車去食晚餐啦。
黎左呢間Làng Nướng Nam Bộ同班親戚食晚飯。
地址：49 Hòa Bình, Quận 11, Thành phố Hồ Chí Minh
呢間餐廳類似酒樓的感覺，
可以比人擺酒結婚等等。
佢有好多間包房，
好多間都係比BB仔擺生日酒，
佢地d生日酒仲會請班小學生咁大的女仔黎跳舞！
誇張過而家香港d小朋友的生日會！
親戚叫左好多碟餸，
打頭陣嘅係海鮮藕苗沙律，
藕苗係蓮花的根部，連接住蓮藕同蓮蓬，
藕苗係越南係好常見架，
藕苗口感有d似洋蔥，都唔錯。
生菜包炸春卷。
呢碟炸糯米雞係將隻雞包住d糯米再拎去炸，
個雞皮又脆、又煙韌，好好味。
蝦&金沙骨。
越式火鍋。
佢個湯底係冬蔭功黎，
但唔似香港咁邊食邊淥，
而係一次過淥熟d肉，
然後用火鍋d湯係自己個碗度淥d米粉，
再加係火鍋淥熟左嘅肉&配菜，
變成一碗海鮮米粉。
海鮮米粉完成！
食飽飽之後，就去左Phố đi bộ Bùi Viện (Bui Vien Walking Street)，
中文叫做碧文街，
呢度簡直係西貢的蘭桂芳。
地址：50-66 Bùi Viện, Phường Phạm Ngũ Lão, Quận 1, Thành phố Hồ Chí Minh
呢條酒吧街好長，條路兩邊大部分都係酒吧，
有d酒吧門口會有人唱歌，
D西人特別high。
多人到好似聖誕節的蘭桂芳。
我地黎左呢間餐廳飲野。
呢度d酒吧好少人會坐入面，
門口係好多位比人坐。
我地叫左新加坡嘅Tiger Beer。
坐一陣就會有小販走過黎問你買唔買小食，
買下d青芒、花生、鵪鶉蛋黎送酒都唔錯。
將d生果點辣辣鹽黎食係好正。
另外，呢度有d小販係童工黎，
應該只有小學生咁大個，
見到佢向人兜售的技巧，
成個古惑仔咁嘅老江湖，
咁細個人仔本應係屋企溫書打機，
但竟然係龍蛇混集的酒吧街度兜售真係好唏噓！
飲完野我地就坐Grab番酒店休息啦，
聽日5:30am出發去頭頓海灘。
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
《去胡志明市玩🇻🇳》
《快閃河內》
0 comments