～今日的行程～

6月6日：小印度 Little India -> 牛車水 Chinatown -> 午：天天海南雞飯 -> 哈芝巷 Haji Lane -> The Shoppes at Marina Bay Sands -> Garden by the Bay ->  晚：1983 南洋風味

之前篇blog都介紹過，我地間酒店去地鐵站係必經ION Orchard商場，
係商場見到美國牌子Brandy Melville的鋪頭，就入去行下先啦，
最後就買左上圖件上身衫，SGD$25！(張相係馬來西亞影的) 

之後我地就搭地鐵去Little India站，
去小印度 Little India行下，
小印度係新加坡一個泰米爾種族的人(Tamils)的社區黎，
一黎到小印度呢個區域，就會見到好多印度餐廳、鋪頭。

最吸引我係呢條賣印度民族衫的街。

d鋪頭前面都掛左好多色彩繽紛的布匹！

牛車水的建築物同小印度都幾似架。
我地沿住呢條Pagoda Street直行。

行到街尾就會見到呢個馬里安曼廟Sri Marianmman Temple。

馬里安曼廟係印度教的寺廟黎，最吸引莫過於呢個樓塔，有好多唔同的彩色神像！
過左馬里安曼廟就經過大馬路，然後向右直行。

上次黎新加坡的時候，下午7點半先黎Maxwell Food Centre，
天天海南雞飯已經賣哂，收緊鋪，
今次我地就特登午餐黎食！
而家大約係下午1點鐘多d，已經有條人龍排緊隊。

左面個碟係男朋友的中size雞飯(Chicken Rice M)，SGD$5，
右面個碟係我的雞脾飯(Chicken Drumstick Rice)，SGD$4.3，
d雞飯好咸好好食，
雞脾d雞滑好多，中size雞飯的雞肉就鞋d，
雞肉的味道就淡d，但配埋咸咸的雞飯就好好食啦。

椰青，SGD$3，d椰青的肉好晶瑩剔透，好薄好滑好軟熟，推薦大家試下，
甘蔗水，SGD$1.5。

之後我地就行一行牛車水，
買左胡振隆、林志源兩間豬肉乾試下。
係胡振隆買左230g的傳統燒烤豬肉乾，SGD$12，
男友就覺得胡振隆的豬肉乾味道一般，口感乾身。
而上次黎新加坡，男友都有買林志源的豬肉乾，
今次買左300g的招牌肉乾，SGD$15.6，
佢覺得林志源比胡振隆的豬肉乾好食。

行去Haji Lane的途中見到座好似皇宮咁靚的建築物，
原來係蘇丹回教堂Masjid Sultan。

終於黎到Haji Lane啦，
其實係一條店鋪林立的小巷，
雖然我剩係影左其中一邊，
其實兩邊都係鋪頭，
中間可以行人，間唔中有車駛入黎，
而呢度d屋都係好似小印度&牛車水咁色彩繽紛架。

而呢度每條小巷都好多塗鴉&藝術品，
可惜當時我地熱到想喊，
完全無意慾去影d好靚的塗鴉。
而Haji Lane附近都有好多酒吧，
呢一帶都係一個好chill的地方！

行行下見到呢座好特別的商業大廈，
佢係DUO Tower的其中一棟黎。

=========================

之後我地就搭地鐵去Bayfront站，
去Marina Bay Sands隔離的The Shoppes at Marina Bay Sands商場，
上次黎新加坡，佢的中文名叫金沙購物中心，
發現而家改左做濱海灣金沙購物商城，好有中國大陸風，
我地會黎呢個商場行下街，去賭場玩番兩手。

Bath & Body Works係香港無門市，
所以每次去澳門＆新加坡都會買佢地的產品番香港。

買左8支消毒酒精，
佢地D消毒酒精非常之香！而且有好多味揀，真係花多眼亂。
上面個5支有半價，折完SGD$1.75一支，
下面個3支有五毫子優惠，折完SGD$3一支，
我最鍾意右下角Japanese Cherry Blossom個隻味，係我第二次買呢隻味啦。

另外，仲買左罐蠟燭& Candle holder，
其實個Candle holder只係用黎裝飾，無咩用途，半價後SGD$9.5，
罐蠟燭非常香，係Honey Suckle Bouquet味，半價後SGD$20。

The Shoppes at Marina Bay Sands商場有條電梯＆天橋通向Garden by the Bay的入口，
上圖係Garden by the Bay的地圖。

上次由於時間的關係，我地只係係天橋離遠同Supertree Grove 擎天樹叢影張相就走，
今次我地終於可以入去啦。

擰轉頭望番Marina Bay Sands！
(想睇番Marina Bay Sands的住宿review請睇呢個blog)

終於黎到Supertree Grove的樹下啦，
呢個巨型的樹係Garden by the Bay的標誌呀，
樹與樹之間就係OCBC Skyway空中走廊啦，我地一陣會上去。

我覺得呢18棵Supertree好有科幻未來感覺，
完全不能想像佢地就係我眼前。

上呢個OCBC Skyway係要買飛的，
價錢係SGD$8 一個人。

天開始日落啦，
係OCBC Skyway上面望番Marina Bay Sands都好靚。

好推薦大家都買飛上黎OCBC Skyway參觀&影相，
當時7點15分，我地都準備落番去啦，
因為Garden Rhapsody燈光show係7點45分就會開始 (另一場會係9點45分開始)，
我地要落去霸定靚位。

7點半開始，天開始越黎越黑，d Supertree都開始著哂燈啦。