我地Day4朝頭早去左京都伏見稻荷大社＆千本鳥居，
去大阪玩 之 Day4a (京都伏見稻荷大社,千本鳥居)
之後我地就出發去奈良啦！

我地係伏見稻荷站搭一個站去丹波橋站，然後行去近鐵丹波橋站先可以搭去近鐵奈良站。

搭近鐵的時候見到架電車有兩層，
我地就坐左上層，
D座位好舒適，而且座椅後面係有用餐板，
發現到原來架電車係去好遠的地方(已忘記左係去邊度啦)。

之後有個職員行過黎同我地講野，
原來我地去奈良的話唔係坐呢卡，
佢提我地要坐咩卡就走左啦。
但我地又聽唔清楚其實佢講係要坐邊卡(聽唔明佢D英文)。

之後我地就問左個乘客，
原來架電車去到某個站就會分體 會去唔同的地方，
有D車卡得一層，
我地就要坐得一層的車卡 先會去到奈良！

其實到左要分體的車站，
廣播都會提你架車將會分體，
所以大家都唔洗太過擔心 記得要留意廣播＆問下人。
－－－－－－－－－－－－－－－－－－－－－－－－－－
終於到左奈良，
近鐵奈良站出面好多商店賣手信，
我地就諗住去完奈良公園返黎先慢慢行。

去到公園的範圍就見到有個警告牌，
牌上寫住叫人小心D鹿會咬人、踢人、用角頂人同埋沖撞人。
睇黎D鹿真係好恐怖 充滿獸性！！

我地行左10分鐘，
終於見到鹿仔們的蹤影，
離遠已經見佢地向住手拎食物的人進攻，
由於我地當時手上無野食，
D鹿望我地雙手兩眼之後 完全當我地無到！

男友打算買D鹿餅去馴服D鹿仔！ 150円一份鹿餅。(我地總共買左3個！)
一買完D鹿仔就開始mark實你，
務求要食哂你手上的餅為止！

好似好饑餓的鹿仔 已經急不及待

成功食餅的招積樣

有隻有角的鹿仔加入食餅
男友捕捉到鹿餅係空中停留的一刻

到男友親親小鹿們

D鹿仔好似食極都唔飽咁

當你手上的餅無哂，
D鹿就會走左去。
我行埋去同D鹿影相，
你睇下佢睬都唔睬你
大部分都會走左去
非常勢利眼！

但唔係隻隻鹿都追住D餅的，
見到有幾隻鹿都懶洋洋咁攤係度hea，
任你影佢。

見佢咁乖 然後我就買包餅慰勞下隻鹿，
點知遠處有隻鹿見到我有野食 又行埋黎食埋一份！

進擊的鹿仔好似想同hea緊的鹿仔講：喂 你唔好爭食喎！

之後我地打算離開啦，
臨走的時候見到遠處有兩隻鹿坐係度hea，
然後遊客排住隊同個兩隻鹿影相！！
可惜無影到相，個兩隻鹿仔實在太乖啦！
－－－－－－－－－－－－－－－－－－－－－－－－－－－－－－－－－－－

我地係奈良的手信店買左隻鹿公仔 佢叫做奈奈子

仲買左個file (而家已經用到殘殘地)
兩樣野總共1400円。
之後仲買左兩舊Mister Donut番酒店食 269円。

然後就番梅田啦。
－－－－－－－－－－－－－－－－－－－－－－－－－－－－－－－
夜晚的時候 我地就係酒店附近的商場行街 然後食野，
係Fancl、Clé de Peau、Gap、Porter、無印都買左野，
收穫好似幾豐富！
遲D再分享下。

之後我地就係Grand Front Osaka度食野，
南館 7F 成層都係食野的！
我地首先去左味の牛たん喜助地址：大阪府 大阪市北区 大深町 4-20 グランフロント大阪 南館 7F

腸拼盤
左面牛脷 右面唔記得係咩啦，
剩係記得全部都係好食架！總共食左2970円。
另外間餐廳都等左陣先有位，食客都係本地人多。

之後我地就去左同一層的福太郎，
我地Day1係難波食唔到，所以今日就係梅田食啦。
去大阪玩 之 Day1c (心斎橋,新世界元祖串,章魚燒)

係你面前燒大阪燒

好吸引
已經唔記得叫左D咩野燒啦，
呢間福太郎係大阪食過的最好食的大阪燒！
食左1960円。

－－－－－－－－－－－－－－－－－－－－－－－－－
我地臨番房休息之前，
仲係Intercontinental Osaka酒店的酒吧Adee度飲野。
地址：大阪府大阪市北区大深町3-60 インターコンチネンタルホテル大阪 20F
酒吧黎講都幾光猛，可以望哂成個酒吧的環境，
好似好多都係OL，放工黎飲野，
呢度仲有DJ播音樂，氣氛好好。
我地各點左杯cocktail，係welcoming drink，免費的！(酒店篇再詳細講下)

Day4完，下一篇係Day5 大阪之旅最後一日。

旅遊日期：2016年6月13日至6月18日