3月7日：Bungy Jumping 笨豬跳 -> 午：Prawn Star Cairns -> Pullman Reef Hotel Casino -> Cairns ZOOM & Wildlife Dome -> 抱樹熊影相 -> Cairns Esplanade Lagoon -> 晚：Tha Fish
我地黎開恩茲第一個活動就係去笨豬跳Bungy Jumping啦！
上次去墨爾本挑戰左跳降落傘Skydiving，
我地旅行前係Klook book左呢個凱恩斯笨豬跳體驗，
原價係HK$1019，扣除優惠碼&積分後，價錢係HK$908.7一個人，
去到現場仲要額外支付每人AUD$10的保險稅。
9:00am，旅遊巴係就係酒店樓下接我地啦。
A. J. Hackett係一位紐西蘭建築師，
佢發現瓦努阿圖的Pentecost Island上的島民會爬上35米高的木塔，
係腳眼上綁上葡萄藤，然後係木塔上跳落黎，
目的係為左祈求農作物有好的收成。
呢個活動令A. J. Hackett受到啟發，佢係1986年間反覆測試同試跳，
終於試到安全嘅方法去玩笨豬跳，仲推廣到全世界，
成為而家唔少熱愛冒險運動的人的Bucket list！
當然笨豬跳都係我地嘅Bucket list啦！
一到埗就見到我地將會跳嘅個座塔啦！
有4個難度的笨豬跳，
我地作為新手，就緊係揀level 1試下先，
每個level都仲有唔同的花式揀。
我地仲加左錢買相同片，AUD$119，
注意係唔可以帶自己的攝影器材玩笨豬跳架。
我地要行上去座塔啦，
由於唔可以帶電話上去，
影唔到行呢座塔上去係有幾恐怖！
一陣我地就係呢座50米高的塔上面跳落黎，
下面係一個湖黎架。
我地笨豬跳的飛仔，
玩之前會磅重，
唔知點解磅出黎的數字比實際係多！(我地邊有咁重呀)
呢度嘅工作人員都好搞笑，氹到我地好開心！
話說呢位工作人員應該有香港人的朋友，
見到我地係香港黎，就知道我地唔鍾意被人稱呼做某強國人，
而叫我地做香港人，哈哈！
安迪會跳bungy jump先，
唔似skydiving，笨豬跳係要自己決定跳落去，
唔係由工作人員推你落去。
除左手上會綁上GoPro外，
塔上都有個camera高抄捕捉跳落去的一刻。
塔上都仲有另一個角度影安迪跳落去的側面。
安迪個樣好似好驚咁。
塔下都有個camera捕捉安迪跳落去的一刻。
湖邊都有個camera。
工作人員問我地想唔想掂到湖水，
由於我地之後仲會抱樹熊影相，
所以就唔想整到個頭濕哂，揀左唔掂水。
所以男友係掂唔到湖水架。
最後當然有GoPro的自拍角度嘅片啦，
安迪幾乎全程都擘大個口，
個樣好震驚咁。
安迪跳完就到我啦，
我覺得我跳落去個姿勢都幾靚嘅。
其實跳落去個刻係需要極大的勇氣架。
側面的角度，
我隻手微微向上，比安迪隻手向下係好睇架。
所以想影到靚嘅笨豬跳相，
大家要記住隻手微微向上舉起。
唔知點解我段橋下片特別震！
工作人員睇黎係考慮埋我馬尾的長度，
所以我d頭髮都掂唔到湖水。
呢段係我GoPro的片段，
跳左落去橋底之後我伸直左隻手，影到頭髮為主，
大家記得可以keep住個GoPro鏡頭影住自己個樣！
其實臨尾我有對住個GoPro say hi，
但比剪片師剪走左之後嘅鏡頭！
(係冇得拎返原片架！！)
安迪跳先過我，
所以佢跳完可以係塔下幫我拍片，
其實我地跳左落去之後仲會彈跳幾下。
彈完之後，
職員會坐橡皮艇接你落黎。
之後就可以揀段片想要嘅背景音樂，
然後等職員幫你剪好段片。
完成之後，就會email條link你上去download片同相啦。
第二日仲收到Ajhackett出嘅笨豬跳cert添！
挑戰完刺激嘅笨豬跳後，
我地就出去食個午餐啦。
雖然呢度係開恩茲嘅市中心，
但係d建築物都唔係好高。
我地由酒店行黎Marlin Marina，
係一個好多遊艇停泊的碼頭。
我地就係黎呢間遊艇上的餐廳 - Prawn Star Cairns，
大家要小心讀間餐廳名，
唔係就變左A片明星啦。
地址：Marlin Marina, E Finger, Berth 31 - Cairns, QLD
我地order呢個Jumbo Platter，AUD$100，
有6隻生蠔、三文魚刺身、蝦、琵琶蝦、大虎蝦。
我地叫左澳洲嘅本地啤酒 - Coopers，AUD$5杯。
係遊艇上食野有種香港避風塘嘅感覺。
我地見到嘅view，
好悠閒的感覺呀。
我地嘅海鮮拼盤上左啦，
係開恩茲咁炎熱的天氣，最岩就係食冰涼的海鮮！
呢度嘅生蠔係好食過Sydney Fish Market嘅生蠔！
成盤海鮮都好新鮮，
食完呢盤野真係好滿足，圓滿左我對Sydney Fish Market嘅失望。
同安迪影返張合照先。
我地之後就行黎The Reef Hotel Casino (又叫做Pullman Reef Hotel Casino)，
參觀下開恩茲唯一嘅賭場。
呢間Pullman酒店除左有賭場外，
仲有個野生動物園Cairns Zoom & Wildlife Dome，
我地買左門票入去抱樹熊！
Cairns Zoom & Wildlife Dome就係呢個玻璃屋頂入面啦。
我地入去賭場玩兩手先，
呢間賭場比澳門金沙個d賭場細好多，
但玩兩手過下癮都夠。
之後我地就去左Cairns ZOOM & Wildlife Dome，
佢係一個室內嘅野生動物園，
我地黎呢度嘅目的就係抱樹熊啦。
門口有一間精品店，
當時有個人吊左係度，
因為呢度有繩索玩架。
呢度有兩度門先入到去動物園，
感覺好似防止d動物偷走左出黎仲有第二度門困住佢地。
呢度唔同嘅鐘數都有show睇，
包括餵雀tour、爬蟲動物show、樹熊知識講座、餵鱷魚tour、夜行哺乳類動物探索。
行行下見到有隻鴨仔。
仲有一堆另一種品種嘅鴨仔。
呢度咁細嘅室內動物園竟然有鱷魚，
呢隻係Freshwater Crocodile，
係澳洲獨有嘅品種，
佢嘅攻擊力低，所以大家見到呢隻鱷魚唔洗驚。
望上上面有好多裝置，
係比人玩飛索嘅。
下次再有機會黎開恩茲都要玩下。
係開恩茲見到最多嘅遊客就係日本人！
周圍都聽到人講日文，
甚至連呢度嘅黑板都有日文字。
呢度有蜥蜴仔。
呢隻好似老鼠咁細嘅係紅腹袋鼠Pademelon，
佢係黃昏個陣先出沒架。
之後我地就join左2點嘅Reptile Show，
職員會介紹動物園入面嘅爬蟲動物。
呢隻係蜥蝪，
職員比我地掂下隻蜥蝪，
咁岩捕捉到佢伸脷嘅一刻。
作為一個IT狗，一講Python就會諗起一隻好受歡迎嘅programming language，
其實Python係呢隻蟒蛇黎架。
呢位年輕嘅職員完全唔驚隻蟒蛇。
職員仲拎呢隻鱷魚小朋友比我地摸下添。
睇完Reptile Show，
我地就繼續睇下動物，
呢度有鸚鵡，佢地都好嘈架。
終於到左黎呢個動物園最期待嘅活動啦，
就係抱樹熊！
全澳洲只有三個州係可以合法抱樹熊，
分別係昆士蘭 Queensland、南澳州 South Australia、西澳州 Western Australia，
由於我地而家就係昆士蘭 Queensland，
終於可以抱住樹熊影相啦。
原來法例規定每隻樹熊每日只可以抱30分鐘炸。
大家估下隻樹熊做緊咩？
答案係柯緊屎！！！！！
影完相後發現身上有幾粒樹熊屎！！！
好彩d便便係乾身嘅。。。
呢度係唔可以用自己相機/手機影相架，
影相服務要額外比AUD$21，總共影左5張相。
職員會幫你print一張相出黎，
仲會印個code比你，
然後上佢個網 download返d相落黎，
我地返酒店hea陣之後，
5:00pm我地就出去行下啦。
我地見市中心有個Rusty's Markets市集，
佢只開星期五六日，
當日係星期四，但我地冇野做就照行去睇下。
地址：57/89 Grafton Street, Cairns City
當時係5點幾，
個市集得兩三檔生果舖開。
之後就行到黎CQUniversity Cairns Square，
呢間大學附近都好多報local tour嘅旅行社。
地址：42-52 Abbott Street & Shields Street, Cairns City QLD 4870
呢度係Cairns Esplanade Lagoon，
係開恩茲嘅一個公眾泳池，
泳池邊仲有d沙添。
泳池上個幾條魚形嘅柱可以話係開恩茲嘅地標，
search開開恩茲總會見到呢幾條魚形柱。
發現好多牌子去到澳洲都會變成另一個名：
雀巢 Nestlé -> Peters
Burger King -> Hungry Jack's
Lay's -> Smith's
大家仲發唔發現到更多呢？
大家仲記唔記得day3我地食左被譽為全悉尼最好食嘅雪糕 - Messina！
原來Drumstick同Messina crossover出左甜筒，
我呢隻係Roasted Hazelnut味。
晚上我地去左位於The Pier商場外圍嘅餐廳Tha Fish，
呢間野顧名思義就係出名食魚嘅。
地址：G7b Pier Point Rd, Cairns City QLD 4870
叫左杯cocktail同埋啤酒。
前菜我地叫左碟Fish cakes魚餅，AUD$6.9。
呢度有5種魚揀，仲有5種煮法嘅選擇，總共25個配搭。
有Atlantic Salmon 三文魚、Coral Trout 東星斑、Wild Barramundi 盲鰽、Mahi Mahi 鯕鰍、Red Emperor 紅魚，
已經唔記得左我地揀左咩魚，
只係記得我揀左呢個Shiitake and ginger crusted fish嘅煮法，
姐係用冬菇同薑整嘅脆皮魚，
呢個煮法係配飯。
安迪叫左Pan seared fish嘅煮法，姐係煎魚，
呢個煮法配左Thai fried noodles 泰式炒麵，
配菜有bamboo shoots筍、chilli peanuts辣花生、lychee荔枝等等。
今晚總共食左AUD$94.5。
分享下我地係開恩茲Woolworths買左乜！
我地想食下生果，又懶得切，
就買左Peach in Mango Jelly黎試下啦。
當時未係香港見過營多味薯片，
竟然係澳洲見到就買黎試下。
左面個包係Dairy Milk with Orea吉百利朱古力，
右面係Tropical味嘅M&M，白色係椰子味、黃色係菠蘿味、綠色係原味。
都係未係香港見過，就買黎試下。
買左呢盒蛋糕仔做早餐，
Mr Kipling Rockin Raspberry Slices，
俾佢地咁可愛嘅包裝吸引而買。
安迪好鍾意用嘅LYNX的止汗劑，
澳洲比香港超市平。
呢個係澳洲牌子MCoBeauty嘅More Brows Brush-On Fibre Gel，
香港未見過呢個牌子就買黎試下。
下篇blog我地會去大堡礁Great Barrier Reef 潛水!!
旅遊日期：2019年3月3日- 2019年3月10日
=========================
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
0 comments