西歐五國星馬畢業遊 Day20b (蘇黎世機場退稅,瑞士航空,Aspire Lounge)

By 曳豬到爆炸 - 3月 27, 2019

～今日的行程～

6月2日：搭火車去瑞士的琉森 Lucerne -> 卡佩爾木橋 Kapellbrücke -> 垂死獅子像 Lion Monument -> 午：Restaurant Caravelle -> 蘇黎世Zurich行下 -> 蘇黎世機場 -> Tax Refund -> Aspire Lounge -> 搭瑞士航空番香港

上篇blog講到我地去左琉森&蘇黎世行下，
之後我地就去左蘇黎世機場啦。

我地check-in完＆寄存行李到飛機之後，
就諗住去tax refund退稅啦，
我地要退稅的單得Premier Tax Free同Global Blue兩間，
係蘇黎世機場Premier Tax Free要係Travelex度退，
Travelex係閘外同閘內都有counter，
我地就打算入閘前去Travelex退稅先。
而Global Blue就係閘內先有counter，
咁我地過左離境＆海關就去Global Blue退稅啦。

Travelex ＆ Global Blue的位置可以去呢個網睇，
記得留意間野有無VAT refunds呢個服務。

大家記得係張單填番d資料先可以成功退稅，
例如全名、地址、出入境日期、退稅方式等等。

兩張單要填的資料都差唔多，
張單其實都會寫埋退到幾多稅＆行政費係幾多，
其實行政費真係好高下，
以上一張單為例，本身收左£5.33稅，退稅行政費要£3.83，最後退到£1.5，
間公司收的行政費可能仲高過你退到的錢架。

Premier Tax Free信用卡退稅係要張D單放入退稅信封 (個信封係購物完商鋪比你的)，
然後寄d單去佢地office度搞的。
我地要退稅的單都係英國買的，
隔左兩個星期，男友已經整唔見左個退稅信封，
於是我地問Travelex比個信封我地入番d單，
然後放係機場入面的郵筒度寄 (張信封係免郵費架)。

(話說本身個信封的地址係寄去英國Premier Tax Free office，
而我地係蘇黎世機場拎的信封，竟然係寄去德國！
我地當時都擔心過寄左去德國會唔會退唔到稅，
都預左會失敗，點知最後竟然退到！
我地係6月2號寄，7月13號信用卡終於收到退稅的款項。)

退左Premier Tax Free的稅之後我地就離境＋過海關啦，
估唔到係蘇黎世機場離境都會分Econ同Business！

之後我地就去Global Blue的櫃台啦。

Global Blue係成個蘇黎世機場得一個櫃台咁大把，所以係零捨多人架。

現金退稅會收多每張單CHF$5的手續費，
我地唔想收瑞士法郎同蝕CHF$5 x 5張單，
所以我地就揀左信用卡退稅。

Global Blue退稅就比Premier Tax Free方便，
當日6月2號係counter登記完退稅，6月5號信用卡就收到退稅的款項啦。

=========================

由於瑞士並非歐盟成員，
所以我地係歐盟國家(如:英國、法國&意大利)買的退稅產品，
就要係旅程入面最後一個歐盟國家(以我為例子，即係意大利)度吸海關印啦。
詳細的經歷請睇呢個blog。

想知我地係英國&意大利買左d咩可以睇Bicester Village的blog＆The Mall的blog。

=========================

搞掂好退稅之後，
我地就行下機場買手信，
行完一轉發現好後悔我地無係少女峰的Lindt Swiss Chocolate Heaven度買瑞士蓮朱古力！
蘇黎世機場的免稅店都係呃人架，
呢度d朱古力比少女峰貴接近一倍價錢，
款式又比少女峰少！
但由於我地無係出面買到瑞士蓮朱古力，
而且又想洗埋d瑞士法郎，
所以都係機場買左d手信。

買左呢幾款係香港未見過的Lindt朱古力，
佢的包裝仲好靚添，
有caramel brownie, crunchy nougat, strawberry cheesecake, cookies & cream四種味，
少女峰賣CHF$2.5，蘇黎世機場賣成CHF$4.5！！！！
少女峰仲有呢款朱古力的條裝賣，好適合拎黎做手信，
但係機場竟然唔見有！

所以就諗住買d可以拎黎派的朱古力，
呢隻長方形的Lindt有6隻味，
我地應該係買左750g個個size，價錢係CHF$36。
呢款朱古力好易溶，大家要小心存放啊。

然後我地就用埋d錢買左排海鹽味的Lindt，
其實香港都有，但係突然好想食又唔知買咩好就買左，
蘇黎世機場價錢係CHF$5，官網只係賣CHF$2.65。

仲買左排阿華田朱古力，CHF$3.3。

=========================

由於我有American Express個張國泰航空尊尚信用卡，
除左可以無限次入環亞機場貴賓候機室 Plaza Premium Lounge之外，
當時張信用卡，頭一年申請係送左Priority Pass 4次使用的機會，
張卡係用黎入環亞以外的機場貴賓室架。(按我申請)

由於蘇黎世機場無Plaza Premium Lounge，
係Priority Pass大派用場的時候啦。

蘇黎世機場有5間Priority Pass入到的lounge，
我就揀左間近登機閘口的貴賓室 - Aspire Lounge。