～今日的行程～
7月2日： 早：Tides -> Helmet Diving 頭盔潛水 -> Tree Shade Spa Mactan揼骨 -> Mactan Shrine -> Island Central Mactan商場 -> 午：Gerry's Grill -> 宿霧國際機場 -> 晚：Bonchon Chicken
我地入住的Shangri-La's Mactan Resort & Spa有兩個地方食早餐，
分別係Aqua同埋Tides，
兩個都係自助早餐。
琴日去左少野食d嘅Aqua，
今日就去食物種類豐富d嘅Tides！
我地8:45am黎到Tides，
呢度嘅坐位都比Aqua多。
酒店早餐我最鐘意係食薯餅，Tides係有嘅！
仲有湯、冷麵拎添！
又見到呢個好似糭嘅食物，
佢做Puto maya，
係講宿霧語的地區較為流行，
Puto maya通常配埋熱朱古力係早餐的時候食，
所以通常都會叫做Puto maya & sikwate。
呢度仲有甜品、雪糕拎添呀！
Tides完勝Aqua！
食完豐盛的早餐，
我地就去玩Helmet Diving 頭盔潛水啦！
今日好好天呀，
我地去resort嘅Sea Sports Center集合啦。
職員講解左頭盔潛水的注意事項之後，
我地就行去resort的碼頭上船啦。
我地出海啦。
我地會由細船轉去呢個準備潛水嘅平台。
安迪率先落水，
頭盔潛水係唔洗著潛水衣架。
落到水先至戴潛水頭盔。
我地落到去水底啦，我地比左Go Pro同埋相機比職員幫我地影相拍片！
大家見到珊瑚入面嘅小丑魚Nemo嗎？
呢個特殊嘅潛水頭盔透過特製的氧氣管線，
係水底都可以好似地面咁自由自在咁呼吸，
我會叫頭盔潛水做懶人潛水！
個潛水頭盔好似太空衣的頭盔，
但我覺得望落去個人好似蠢左 XD
我地係水底跳躍呀，
要雙手捉實個頭盔，以免佢甩左出黎。
安迪感覺非常良好。
然後職員用魚糧吸引左好多魚埋黎。
好多魚係我地身上游走呀。
職員捕捉到安迪好搞笑的一刻。
究竟佢伸隻手出黎搞咩呢？
配埋個頭盔，望落真係超級蠢咁。
海底搭左d欄杆，
好方便我地捉黎行。
這是海蛇嗎？
職員叫我地摸下呢個珊瑚的質感。
我地都好認真咁摸。
職員仲放d氣泡比我地玩。
呢d藍色的細魚好靚呀。
職員仲捕捉到Nemo同佢媽媽呀XD
今次呢個頭盔潛水係PHP$2240一個人(約HKD$360)，價錢唔平，
不過諗起呢個係酒店嘅水上活動，
而且有咁多位職員協助我地玩頭盔潛水，
咁貴都值得嘅。
=========================
玩完頭盔潛水，我地就係resort度周圍行下，
見到呢個手拎劍同盾牌的男人銅像，
其實佢叫做拉普拉普 Lapu Lapu，曾經係Mactan島的酋長，
1521年的時候Lapu Lapu殺死入侵Mactan島的葡萄牙探險家麥哲倫(Ferdinand Magellan)，
自此佢就被視為菲律賓第一位民族英雄，
宿霧的Lapu-Lapu City就係因為Lapu Lapu而命名啦。
而當時麥哲倫係幫西班牙國王搵條可以向西去到印尼「香料群島」嘅航線，
麥哲倫係1519年西班牙出發，經南美洲最南邊(現稱麥哲倫海峽)入太平洋，
1521年入侵Mactan島被Lapu Lapu殺死，
但佢船隊繼續向西行返西班牙，成為第一個環繞地球一圈嘅船隊。
呢度係Main Pool and Water Slide，
有滑梯&好大個游泳池比小朋友玩。
Resort種植左好多植物，感覺好舒服。
之後我地就黎左Ocean Wing Pool玩下水，
呢度可以望到day1的private beach架。
呢個泳池細d，但無咩人。
安迪幫我影相的分別係....佢完全無理到背景個水平線。
呢張終於對齊水平線啦！
男友好嘆係度游水，
而我就廢時游啦。
玩完水我地就返酒店執野準備check out啦，
想睇我地買左咩手信，請睇day2篇blog啦！
我地今晚搭8:20pm嘅機返香港，
仲有好多時間剩，
於是我地就去左resort附近嘅Tree Shade Spa Mactan揼下骨先。
地址：Punta Engano Rd, Mactan 6015 Lapu-Lapu City, Philippines
大堂有位置放行李，
睇黎好多人check out後都黎呢度揼骨！
揼骨前，技師會係大堂幫我地雙腳清潔&磨沙。
之後我地就上樓上啦，
呢度的設計都好泰式佛教。
我地入房啦。
我地兩個都係同一間房度揼骨，
反而房間入面嘅佈置都好中式呀，
特別係兩盞燈籠同呢幅古代嘅畫。
揼完骨之後，技師會比杯茶你飲，
通常都會係籃度放低少少貼士比技師架。
呢個歴時兩個鐘舒服嘅spa，我地每人比左PHP$1450，都只係HK$230。
=========================
之後我地就搭Grab黎到Mactan Shrine，
呢度記錄住Mactan島重要的歴史。
呢座係麥哲倫神殿 (Magellan Shrine)，
係為左紀念葡萄牙探險家麥哲倫 (Ferdinand Magellan)，
佢第一位成功到達菲律賓的歐洲人。
當時麥哲倫帶領60多人想入侵Mactan島，燒毀島民的村莊，
島民為左保護家園，用標槍＆斧頭向麥哲倫還擊，
最後Mactan島的酋長Lapu Lapu殺死左麥哲倫。
呢個石碑刻左麥哲倫係Mactan島戰事中陣亡的日期，即係 1521年4月27日，
亦都記錄左Lapu Lapu係第一個企出黎抵抗歐洲殖民入侵的菲律賓人。
而呢個肌肉發達、留長髮、手上拎住劍和盾牌的男人雕像就係民族英雄Lapu Lapu啦。
Mactan Shrine除左記念Mactan島呢場戰事之外，
仲有好多賣手信的攤檔。
大家可以留番d彈藥係呢度買手信呀。
=========================
之後我地就黎左Island Central Mactan商場，
黎左呢間Gerry's Grill食野，係菲律賓嘅連鎖餐廳黎架。
地址：M. L. Quezon National Highway Island Central Mactan, Lapu Lapu 6015 Philippines
我地嗌左3碟餸，等我分享下食左d乜啦。
飲品方面我叫左Calamansi Juice，中文係酸柑，PHP$75，
Fresh Buko Juice，Buko其實就係椰子啦，PHP$85。
Pork Barbecue，PHP$165，
呢個燒豬肉燒得好好食，夾埋面頭d蜜汁好正。
Tokwa't Lechon Kawali，PHP$225。
炸豆腐伴燒乳豬腩，
d豆腐好脆，索哂d汁酸酸地好好味，
而燒腩仔就皮脆，但肉乾。
Sizzling Sisig，PHP$215，
鐵板炒碎乳豬，Sisig係菲律賓地道的菜式黎架，
由1997年開始就係呢間餐廳最好賣嘅菜式，
我地係Day2的Zubuchon都有食Sisig，
而呢間就加左蛋、d乳豬脆d，
Zubuchon d乳豬就肥d。
職員幫我地撈埋佢添。
Garlic Rice，PHP$46，
自從係水上餐廳食過Garlic Rice後，
成個trip都瘋狂叫黎食，但始終都係水上餐廳最好食！
Inihaw Sauce，係用黎點豬肉架。
總括黎講，呢間Gerry's的野食都好岩我地胃口！
連稅後總共食左PHP$862.87。
之後就去左Island Central Mactan商場入面行下，
入呢個商場要過金屬探測安檢門，
而且我地身上個行李都要寄存係保安個度，
正呀，我地就唔洗拖住個喼行街。
跟住我地黎左呢間Ronbinsons Supermarket，
我地剩係買左兩罐野飲，
Day2間Savemore買完覺得好好飲，
於是就番兜呢罐LOCALLY Tamarind，羅望子汁，PHP$25.75，比Savemore平少少！
仲試埋呢罐LOCALLY Dalandan，橙汁，PHP$25.75，
味道唔同飲開嘅橙汁，
好奇怪的味道，但唔難飲。
呢間係來自宿霧的服裝店Penshoppe，
佢地搵左好多知名的歌手做model，
當時櫥窗個model就係英國組合One Direction前成員Zayn Malik啦。
我買左呢件T-shirt，PHP$299，(約HK$48，超平！)
上面寫住"I broke up with my gym. We were just not working out"
買左呢條好休閒feel嘅牛仔褲，PHP$699 (約HK$112)。
仲買左呢條出街嘅牛仔褲，PHP$699 (約HK$112)。
之後我地就搭Grab出發去機場啦，
話說成日係宿霧見到圖中呢d van仔，係公共交通工具黎，
每架車嘅圖案都唔同架，呢架個design比較普通。
宿霧新的國際機場Terminal 2 係2018年7月1日正式開幕，
而Day1個個舊機場Terminal 1就會用黎做內陸機的航線，
司機大佬都係第一次黎新機場，都唔係好識路駛入黎呀。
新機場嘅設計好似香港機場用圓拱形屋頂，
頂層係玻璃，陽光可穿透落地下，
最特別的地方係室內用木質的屋頂，
好有東南亞度假的感覺。
睇新聞原來呢個機場係由香港同菲律賓的設計師合作設計，
唔怪得機場外表咁有香港機場的影子啦！
可能因為今日只係機場開放的第二日，
入黎機場個大堂都要check護照&登機資料，
所以只可以係機場門口送機。
雖然機場已經開幕 ，
但當日見到好多地方仲係裝修緊，
睇黎政府好趕住開呢個新機場。
好鐘意佢個木質的屋頂呀。
check in航班的時候竟然撞到朋友，
同一班機返香港！
Day1提及過機場職員想收我係香港帶黎嘅袋USD$100的稅，
最後我地揀左寄存個袋係機場，
最後我地揀左寄存個袋係機場，
離境先拎番，
由於已經啟用新機場，
都唔知去邊先拎番我寄存嘅袋，
於是check in航班的時候就搵左CX地勤幫手。
原本只係想問下CX地勤知唔知應該要去邊度拎返個袋，
點知佢好好人咁幫我問哂所有同事，
但結果都冇人知......
因為機場太新，所以佢帶我周圍去問機場職員，
搭lift上上落落幾次，又試過入去職員通道(禁區)，
結果搵到一個比較大粒的機場職員幫手。
原來海關office係位於arrival hall入面，
而且旅客只可以出唔俾入去，
好彩呢個職員夠權限俾我入去。
入到去arrival hall搵到海關間房 (上圖)，
地勤幫我問左一輪海關職員，
個海關職員先幫我搞拎返個袋嘅手續。
職員叫我俾PHP$1500佢，
我就問佢乜唔係PHP$500咩?
佢話我由6月3號開始寄存所以要收PHP$1500，
(原來張收據寫左我6月3號開始寄存!!!)
我就同佢講我係6月30號先到宿霧，
仲俾埋本護照佢睇，
搞左一輪佢先至收我PHP$150(約HKD$22)同俾返個袋我!
雖然最後只係花費HKD$22，
但就浪費左我地好多旅行寶貴嘅時間!
真係多得Day1想呃我地USD$100嘅海關職員!!!!
真係多得Day1想呃我地USD$100嘅海關職員!!!!
拎返個袋之後我地就入去過關啦，
不過離境之前要係呢個counter度交機場稅。
要比PHP$850機場稅一個人。
唔知係咪因為機場新開幕，
過安檢check隨身行李的時候都幾乎驗屍咁驗！
過左關就係免稅店啦。
我係度敗左支Mac唇膏，色號係MEHR，
價錢係PHP$1050。
仲有d手信店行下添。
我地買左呢間來自韓國嘅Bonchon Chicken炸雞做晚餐。
有好多位比人坐。
買左3件Chicken Fries，PHP$143。
仲買左Drum & Wing餐，PHP$215，
有一隻雞鎚、一隻雞翼、一盒飯、一杯汽水。
食飽飽我地就上機啦。
宿霧上空嘅夜機。
當時係10:20pm，係我地嘅宵夜呀。
旅遊日期：2018年6月30日- 2018年7月2日
=========================
=========================
| 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ 收到個blog的最新update！ |
0 comments