西歐五國星馬畢業遊 Day22 (新加坡酒店篇,Four Seasons Hotel Singapore,Grandma's新加坡菜,三巡海南雞)

By 曳豬到爆炸 - 4月 10, 2019

～今日的行程～

6月4日：ION Orchard 行街 -> 午：三巡海南雞飯 -> Raffles City行街 -> 晚：Grandma's Restaurant (新加坡菜) -> 住：Four Seasons Hotel Singapore

想睇番西歐五國星馬畢業遊的行程，請睇行程篇 (27日景點行程分享,機票資料)

早上check out左位於紅燈區的Fragrance Hotel - Crystal之後，
我地就拖住喼搭地鐵黎Orchard站check in另一間酒店啦。

上一次黎新加坡嘆，住左兩間靚景的酒店，
分別係金沙的Marina Bay Sands、Ritz-carlton Millenia，
今次我地唔住咁豪啦！
係香港住唔起四季酒店，
而新加坡的四季酒店價格就相宜好多，
我地之後呢兩晚都住係新加坡的四季酒店 - Four Seasons Hotel Singapore。

我地出左ION Orchard商場，
之後過大馬路去Wheelock Place商場，
然後沿住藍色點點去四季酒店。

之後我地發現，ION Orchard有條路通去Wheelock Place入面，
然後上一層，穿過Wheelock Place，係商場的另一個入口離開，
最後沿住紅色線去四季酒店，
呢個方法就可以一半路程都嘆住冷氣、行住商場咁番酒店啦。

我地去到四季check in的時候有welcome drink，
而且原本3點先可以上房，而家1點就有房啦！

我地入住的日期係4/6-7/6，
房型係Deluxe Room, 1 King Bed，
價錢連稅扣埋優惠碼係HK$5091.76 三晚，即係HK$1697.25 一晚，
地址：190 Orchard Boulevard, Singapore, 248646 Singapore。

等我為大家解構下新加坡的四季酒店啦！

首先一入門口係有個衣櫃。

左手面就係浴室。

有兩個洗手盆，
朝早男友唔洗讓洗手盆比我用，咁就唔會有藉口懶床啦。

左手面係馬桶。

右手面係浴缸＆淋浴的位置，
好鐘意浴缸上有個架呀。

出番黎睡房的位置，
呢度係梳妝台。

有Macaron！

睡床～

書台&電視機。

有意大利牌子Lavazza的咖啡室＆膠囊咖啡。

仲有新加坡的TWG Tea茶包，
天呀，有6款比你飲，
我最鐘意Yunan FOP 雲南FOP呢個茶包，
係清清地帶點普洱的香味。

酒店望到的景，
雖然個景無Marina Bay Sands＆Ritz-carlton Millenia咁正，
但咁岩前面呢兩座建築物都好特別。

話說我地最後個晚發現張床有疑似昆蟲的腳！
我地立即打比前台叫佢幫我地換床單！
之後酒店職員都好快上黎幫我地換，
估唔到五星級酒店的床都會搵到有異物，真係嚇親！

=========================

係酒店hea左陣之後，
我地就去ION Orchard行下街，
然後又黎左上次都有黎的Food Opera 醫醫肚，
地址：#B4-03/04 ION Orchard, Singapore 238801, Singapore。

我地揀左呢間Sergeant Hainanese Chicken Rice 三巡海南雞飯，
緊係要叫碟海南雞飯啦，有大中細3個三種份量揀，
我地呢碟係中，SGD$7.6。

仲叫左碟咖哩雞麵，SGD$6.5，
咖哩味好香，但好辣，但d雞就無乜咖哩味，
加埋政府會收7%的稅，總共食左SGD$14.1。

食飽飽就去左Bengawan Solo，好出名的班蘭蛋糕餅店，
我地今次都係打算係機場先至買班蘭蛋糕，
另外機場的Bengawan Solo係免稅會平D架，
不過我地依舊買左D糕點番酒店食，
7件糕點都只係SGD$8.2，
地址：2 Orchard Turn, #B4-38 ION Orchard。

我地行行下ION Orchard覺得頂唔順，太眼訓啦，
琴日搭完10幾個鐘機，再搭接近4個鐘的機黎新加坡，
凌晨一點幾先到達酒店，今朝又要早起check out，
所以決定係酒店補番個眠先。

=========================

夜晚我地就搭地鐵去City Hall站，
去Raffles City廣場食晚餐！