～今日的行程～
1月28日：早：米卡沙旅店 -> 太陽餅街 -> 魚刺人雞蛋糕 -> 蝦帕 SHRIMPPA -> 審計新村 -> 黑沃咖啡HWC -> 由本室油飯 -> 草悟道 -> 午：春水堂 -> 桃園機場 -> 晚：Plaza Premium Lounge -> 香港機場
今日係呢個trip嘅最後一日啦，
我哋係台中玩多陣，
就會去桃園機場啦。
我哋住嘅米卡沙旅店會包埋早餐，
竟然唔係buffet，
而係有6個餐比你揀，
我哋都揀咗唔同餐，
安迪揀咗豆漿，而我就飲烏龍茶 。
呢個早餐都算係幾高質，
下篇blog再詳細介紹間旅店。
之後我哋就黎咗太陽餅街買手信，
黎台中梗係要買太陽餅啦。
係一福堂老店買咗兩盒太陽餅，
一盒係古早味，
另一盒係雜錦，有蜂蜜、沖繩黑糖、芋頭、頂級鮮奶太陽餅，
仲買咗佢哋嘅檸檬餅。
當年係疫情嘅初期，周圍都無口罩，
但竟然比我哋遇到間藥房有口罩，
但一人限買一盒，
我同安迪一人買咗一盒。
行行下見到呢條瓦庫巷好打卡。
之後我哋就行去審計新村，
途中見到呢間魚刺人雞蛋糕，
係一間源自台中街頭嘅文青風雞蛋糕小食店，
而家開到全台灣都有分店。
地址：台灣臺中市西區昇平里民生路368巷1弄
佢哋嘅雞蛋糕有好多唔同嘅口味，
翻譯做廣東話之後有原味、芝士、吉士、黑朱古力、阿薩娒紅茶、抹茶、阿薩娒紅茶吉士，
仲有當時嘅新年限定：芝麻麻薯吉士、蛋黃流沙吉士味。
最後就嗌咗吉士味(牛奶卡士達)，TWD$55，
同埋芝麻麻薯吉士味(芝麻QQ雞蛋糕)，TWD$70，
一份有5粒。
離開咗魚刺人之後，
就比呢架蝦帕 SHRIMPPA美食車吸引咗。
我哋買咗呢碌蝦棒棒，TWD$35。
食完咁多野之後，終於黎到審計新村啦，
佢係由老舊房屋(眷舍)改造而成嘅文創區，
呢度除咗有啲文創小店，仲會經常舉行暮暮市集。
頭先食咗咁多野有啲口渴，
比呢間黑沃咖啡HWC吸引咗。
試下佢地拎咗台中珍奶節雙冠王嘅黑糖黑玉拿鐵，
吹到好大，
但我哋覺得還好啦。
呢個就係暮暮市集啦，
超級多人，好迫呀。
見到呢間由本室油飯好多人買，
我哋又買黎試下啦。
個飯盒嘅包裝好靚，好有質感。
佢哋嘅油飯係用咗糯米飯，
入面仲有蝦米、冬菇、肉絲等等。
審計新村有兩層，
上一層可以俯瞰呢個暮暮市集。
呢個審計新村都幾好行，
買下精品同食下野。
當時審計新村仲放咗ELLE雜誌攤檔比人打卡影相。
審計新村外圍都有啲商店行下，
呢間AirMilk入面有好多扭蛋機。
我哋入去行吓，都幫襯咗少少。
之後我哋行下行下，
就行咗黎國立臺灣美術館，
但只係經過，冇入去參觀。
之後就行下草悟道，
見到呢個同草悟道有啲格格不入嘅青銅雕像，
佢係暴雪娛樂 (Blizzard Entertainment) 著名魔獸Warcraft系列遊戲入面嘅主角之一阿薩斯 Arthas Menethil。
呢種抽象嘅雕塑先至冇違和感。
草悟道呢度竟然有個英才福德廟。
我叫咗珍珠紅豆鮮奶茶，TWD95，
我好鍾意飲春水堂嘅紅豆珍奶架。
安迪飲頂級烏瓦紅茶，
係佢個東坡肉套餐包嘅。
我就叫咗招牌滷味豆乾米血，TWD$155。
上次同老best試咗東坡肉覺得好正，
今次都大推安迪試下，
呢個係套餐黎嘅，TWD$290。
之後我哋就由高鐵台中站搭去高鐵桃園站。
我哋預先係kkday買咗【台中出發】台灣高鐵8折優惠車票(外國人限定電子票)，
當時台中去桃園嘅單程係HKD$130一個人。
呢架高鐵座位都幾闊落，
台中去桃園嘅高鐵車程大約係45分鐘。
我哋到咗桃園機場之後，
見到有間糖村，
就入去買啲手信啦。
入咗機場禁區之後，
我哋就黎咗Plaza Premium Lounge食嘢。
回程我哋都係搭國泰航空。
呢包係台灣買嘅抗病毒濕巾，
當時疫情嘅初期，
我哋一上機就係咁咦消毒下個座位啦。
當時嘅飛機餐，
有個飯同埋一支水。
呢個5日嘅旅程就完結啦，
一次過去哂高雄、台南、台中同埋南投縣嘅清境。
旅遊日期：2020年1月24日 - 2020年1月28日
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
《去台灣玩》
0 comments